ပျားကြီး၊ ဇွန်လ ၂၉ ရက်၊ မင်းကွန်း
စစ်ကိုင်းတိုင်း မင်းကွန်းဒေသအတွင်းမှာ စစ်ကောင်စီက ကြည်း၊ ရေ၊ လေ အင်အားအလုံးအရင်းနဲ့ စစ်ကြောင်းထိုးနေတာကြောင့် ဒေသတခုလုံးဟာ ဘေးလွတ်ရာကို ထွက်ပြေးတိမ်းရှောင်နေရတယ်လို့ ဒေသခံတွေက ပြောပါတယ်။
အခုရက်ပိုင်းအတွင်း စစ်ကောင်စီတပ်ဟာ အင်အား ၂၀၀ ဝန်းကျင်နဲ့ မြေပြင်စစ်ကြောင်းထိုးမှုတွေ ပြုလုပ်နေတာဖြစ်ပြီး ဧရာဝတီမြစ်အတွင်းက စစ်သင်္ဘောတွေနဲ့ လေယာဥ်တွေက အဲဒီစစ်ကြောင်းကို လိုက်လံကူညီပေးနေတာ ဖြစ်ပါတယ်။
“ရွာစဥ်တလျောက်လုံး စစ်ကြောင်းထိုးနေတာပေါ့။ အိမ်တွေထဲဝင် တွေ့တာယူ။ ပြီးရင် မီးရှို့။ ဘုန်းကြီးကျောင်းတွေပါ မချန်ဘူး။ အကုန်ဝင်၊ အကုန်ယူပဲ။ ရေကလည်း တက်နေတော့ ပြေးရတာ အဆင်မပြေဘူး။ အရမ်းဒုက္ခရောက်တယ်” လို့ ကင်းကျေးရွာက ဒေသခံတစ်ဦးက ပြောပါတယ်။
စစ်ကောင်စီရဲ့ စစ်ကြောင်းဟာ ဘုန်းတော်ကြီးကျောင်းတွေကိုပါ ဝင်ရောက်မွှေနှောက် ရှာဖွေမှုတွေ ပြုလုပ်နေတာကြောင့် မင်းကွန်းဆရာတော်ကြီးရဲ့ တိပိဋကနိကာယကျောင်းတိုက်က စာဖြေသံဃာတော်တွေအပါအဝင် ဒေသတွင်း ဘုန်းတော်ကြီးကျောင်းပေါင်း ၂၀ ကျော်က ရဟန်းသံဃာတွေ အားလုံးလည်း ဘေးလွတ်ရာကို ထွက်ပြေးတိမ်းရှောင်နေရတယ်လို့ ဒေသခံဆရာတော်ကြီးတစ်ပါးက မိန့်ပါတယ်။
လက်ရှိအချိန်မှာ မင်းကွန်းတောင်ရွာ၊ မြောက်ရွာ၊ ရှားရောင်း၊ ကင်း၊ ချောင်းမကြီး၊ အုန်းသဇင်၊ မြေတိုင်း၊ ရွှေဂဲပျံ၊ အိုင်းဒိုင် စတဲ့ကျေးရွာတွေအပါအဝင် ဒေသတွင်းက ကျေးရွာပေါင်း ၂၀ ကျော်က သောင်းနဲ့ချီတဲ့ ဒေသခံတွေဟာ ဘေးလွတ်ရာကို ထွက်ပြေးနေရတယ်လို့ ဒေသခံတွေက ဆိုပါတယ်။
ဧရာဝတီမြစ်ကမ်းတလျောက် မြောက်ဖက်ကို ဦးတည်ပြီး စစ်ကြောင်းထိုးနေတဲ့ စစ်ကောင်စီဟာ စစ်ကြောင်းဖြတ်သန်းရာ လမ်းတလျောက်က ကျေးရွာတွေကို ရွာလုံးကျွတ် မီးရှို့ဖျက်ဆီးမှုတွေ ပြုလုပ်နေတာကြောင့် လက်ရှိအချိန်မှာ ရှားရောင်း၊ ကင်း၊ ချောင်းမကြီးနဲ့ အုန်းသဇင်ကျေးရွာတွေက အိမ်ခြေပေါင်း ၅၀၀ ကျော်ဟာ မီးလောင်ပျက်စီးခဲ့ရတာ တွေ့ရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
