ပျားကြီး၊ ဇွန် ၂၇၊ မင်းကွန်း
စစ်ကိုင်းတိုင်း၊ မင်းကွန်းဒေသက ငလျင်ဒဏ်သင့်ကျေးရွာတွေကို စစ်ကောင်စီကမီးရှို့ဖျက်ဆီးမှုတွေပြုလုပ်နေတယ်လို့ ဒေသခံတွေကပြောပါတယ်။
ဒီနေ့ ဇွန်လ ၂၇ ရက် မနက်ပိုင်းကစပြီး မင်းကွန်းဒေသမြောက်ခြမ်းက ကျေးရွာတွေကို စစ်ကြောင်းထိုးမီးရှို့ဖျက်ဆီးမှုတွေ ပြုလုပ်နေတာဖြစ်ပါတယ်။
“ချက်ချင်းကြီးဝင်လာပြီး ပစ်တာ။ ပြီးတော့ မီးရှို့တော့တာပဲ။ အဝတ်တထည် ကိုယ်တခုနဲ့ပြေးရတာ။ မန္တလေးဖက်ကိုလည်းပြေးလို့မရဘူး ရေကြောင်းကပိတ်ထားတာ။ တောထဲပဲဝင်ပြေးနေရတာ”လို့ ကင်းကျေးရွာကဒေသခံတစ်ဦးက ပြောပါတယ်။
လက်ရှိသတင်းရေးသားချိန်ည ၈ နာရီအထိ ကျေးရွာတွေကို မီးရှို့ဖျက်ဆီးမှုတွေပြုလုပ်နေဆဲဖြစ်ပြီး နောက်ဆုံးရရှိထားတဲ့အချက်အလက်တွေအရ အိမ်ခြေ ၂၀၀ နီးပါးရှိတဲ့ ကင်းကျေးရွာတခုလုံးမီးလောင်ပြာကျခဲ့ရပြီး ပြည်သူ ၇ ဦးထက်မနည်းကိုလည်း စစ်ကောင်စီကပစ်သတ်ခဲ့တယ်လို့ ဒေသခံတွေကဆိုပါတယ်။
အခုလိုစစ်ကြောင်းထိုး မီးရှို့မှုတွေကြောင့် ကင်း၊ ချောင်းမကြီး၊ အုန်းသဇင်၊ မြေတိုင်းစတဲ့ကျေးရွာတွေအပါအဝင်ကျေးရွာပေါင်း ၁၀ ရွာထက်မနည်းကဒေသခံ ၈၀၀၀ ကျော်ဟာဘေးလွတ်ရာကို ထွက်ပြေးတိမ်းရှောင်နေတာ တွေ့ရပါတယ်။
လက်ရှိမှာတော့ မီးရှို့ခံထားရတဲ့ နေအိမ်စာရင်းနဲ့ သတ်ဖြတ်ခံထားရတဲ့ လူဦးရေးစာရင်းကို ထပ်မံစုံစမ်းနေဆဲ ဖြစ်ပါတယ်။
မင်းကွန်းဒေသဟာ ပြီးခဲ့တဲ့ မတ်လ ၂၈ ရက်နေ့ကလှုပ်ခတ်ခဲ့တဲ့ ငလျင်ဒဏ်ကြောင့် မြေကွဲအက်မှုတွေ၊ နေအိမ်ပြိုကျပျက်စီးမှုတွေရှိခဲ့ပေမဲ့ စစ်ကောင်စီက ကူညီကယ်ဆယ်ရေးလုပ်ငန်းတွေ လုပ်ဆောင်ခွင့်မပေးခဲ့တာကြောင့် ဒေသခံတွေဟာလက်ရှိအချိန်ထိနေထိုင်စားသောက်မှုမှာ အခက်အခဲတွေအများအပြားရှိနေတယ်လို့ ဒေသခံတွေကပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
