ပျားကြီး၊ ဇွန် ၉ ရက်၊ အင်းဝ
ဒုတ္ထဝတီမြစ်ရေမြင့်တက်လာပြီး ကမ်းပါးပြိုကျမှုတွေရှိလာတဲ့အတွက် အင်းဝမြို့ဟောင်းမှာရှိတဲ့ အိုးတုတ်တန်းကျေးရွာက ဒေသခံတွေဟာ ဘေးလွတ်ရာကို ပြောင်းရွှေ့နေထိုင်မှုတွေ စတင်ပြုလုပ်နေရပြီလို့ ဒေသခံတွေက ရွှေဖီမြေကို ပြောပါတယ်။
အင်အားပြင်းစစ်ကိုင်းငလျင်ဒဏ်ကြောင့် အင်းဝမြို့ဟောင်းရဲ့ အရှေ့မြောက်ပိုင်းက အိုးတုတ်တန်းကျေးရွာမှာ မြေအက်ကွဲပြိုကျမှုတွေရှိခဲ့ပြီး မြစ်ရေမြင့်တက်လာမှုကြောင့် အက်ကွဲကြောင်းတွေထဲ ရေဝင်ရောက်ပြီး ကမ်းပါးတွေပြိုကျနေတာ ဖြစ်ပါတယ်။
“အရမ်းမြန်တယ်။ အက်ကြောင်းတွေထဲရေပြည့်တာနဲ့ ပြိုတော့တာပဲ။ အက်ကြောင်းတွေက အိမ်တွေအောက်အထိရှိနေတော့ စိုးရိမ်ရတယ်။ အဲ့ဒါကြောင့်ကြိုပြီးရွှေ့ကြတာပေါ့”လို့ ဒေသခံအမျိုးသမီးတစ်ဦးကပြောပါတယ်။
အိုးတုတ်တန်းကျေးရွာအပါအဝင် အနီးအနားကျေးရွာတွေဟာ နှစ်စဥ် ဇူလိုင်နဲ့ ဩဂုတ်လတွေမှာမြစ်ရေလျှံတက်မှုကြောင့် အနည်းဆုံး ၃ ပေကနေ ၅ ပေအထိရေဖုံးလွှမ်းခံရလေ့ရှိတဲ့အတွက် ဒီနှစ်မှာ ငလျင်ဒဏ်သင့်အက်ကွဲကြောင်းတွေကြောင့်မြေပြိုကျမှုတွေရှိလာနိုင်တဲ့အပေါ် စိုးရိမ်ထိတ်လန့်မှုတွေရှိနေတယ်လို့ ဒေသခံတွေက ဆိုပါတယ်။
လက်ရှိအချိန်မှာ မြစ်ကမ်းအနီးကနေအိမ်ပေါင်း ၅၀ နီးပါးက ဒေသခံ ၂၀၀ ကျော်ဟာ အင်းဝမြို့ဟောင်းထဲက ရေလွတ်ရာနေရာတွေမှာ ယာယီပြောင်းရွှေ့နေထိုင်ဖို့ စီစဥ်ထားပေမဲ့ မြို့ဟောင်းကလည်း ငလျင်ဒဏ်ကြောင့် အဆောက်အဦတွေ ပြိုကျပျက်စီးထားတာကြောင့် ခက်ခဲမှုတွေရှိနေတယ်လို့ သေခံတွေကပြောပါတယ်။
“အရင်နှစ်တွေတုန်းက ရေတက်လာရင် မယ်နုအုဋ်ကျောင်းထဲပြေးကြတာပဲ။ ဒီနှစ်ကျ အုဋ်ကျောင်းကလည်းပြိုပြီဆိုတော့ ပြေးစရာနေရာသိပ်မရှိတော့ဘူး။ ရေတက်မယ့် ဝါဆို၊ ဝါခေါင်ဆိုရင် အကုန်ဒုက္ခရောက်ပြီ”လို့ အသက် ၉၄ နှစ်အရွယ် ဒေသခံအဘိုးအို တစ်ဦးက ဆိုပါတယ်။
လက်ရှိအချိန်မှာ ဒုတ္ထဝတီမြစ်ကမ်းပါး ပေပေါင်း ၃၀ ကျော်ပြိုကျပျက်စီးခဲ့ပြီး မြစ်နဲ့ ပေပေါင်း ၂၀၀ ဝန်းကျင်ကွာဝေးတဲ့နေရာတွေအထိ မြေပြင်အက်ကွဲကြောင်းတွေ ရှိနေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
