ပို့လဘား၊ ဇွန်လ ၁၄ ရက်၊ ညောင်ရွှေ
ရှမ်းတောင် ညောင်ရွှေမြို့နယ်က ရပ်ကွက်တချို့တွေမှာ ရေမြှင့်တက်လာမှုကြောင့် ဒေသခံတွေ ရွှေ့ပြောင်းနေထိုင်ကြရတယ်လို့ ဒေသခံတွေကပြောပါတယ်။
ညောင်ရွှေမြို့ အနောက်ဘက်ခြမ်းက အနိမ့်ပိုင်း ရပ်ကွက်တချို့တွေမှာ မနေ့ ဇွန်လ ၁၃ ရက် နေ့လယ်ပိုင်းကစပြီး ရေမြှင့်တက်လာပြီး ရေကြီးမှု ဖြစ်ပွားမှာကို စိုးရိမ်တာကြောင့် ဒေသခံတွေက ရွှေ့ပြောင်းနေထိုင်ကြတယ်လို့ ညောင်ရွှေဒေသခံအမျိုးသားတစ်ဦးက ပြောပါတယ်။
ညောင်ရွှေဒေသခံအမျိုးသားတစ်ဦးက”မနေ့ည ၁၂ နာရီကတည်းက ရွှေ့ပြောင်းနေကြတယ်။ ဈေးထဲကဆိုင်တွေလည်း ရွှေ့ပြောင်းနေကြပြီ။ အခုကမြို့ရဲ့သုံးပုံတစ်ပုံလောက်ရှိနေပြီ။ အိမ်ဝင်းထဲတောင်ရောက်နေပြီ။ မနေ့ညနဲ့ ဒီမနက် ခဏလေးမှာပဲ ၂ ပေ ၃ ပေ လောက်ရေတွေဝင်လာတယ်။ မြို့ရဲ့ မိန်းလမ်းဘေးရဲ့ အနောက်ဘက်ခြမ်းတွေလည်း မြုပ်နေပြီ။ ရွှေနဂါးတို့ အိမ်ဆောက်ပစ္စည်းရောင်းဝယ်ရေး အဲဘက်တွေလည်း ရေတွေစဝင်နေပြီ”လို့ ဆိုပါတယ်။
ညောင်ရွှေမြို့ အနောက်ဘက်ခြမ်းက ဒေသခံတွေဟာ ရေကြီးမှုဖြစ်လာမှာ စိုးရိမ်တာကြောင့် ညောင်ရွှေမြို့က အရှေ့ဘက်ခြမ်းမှာရှိတဲ့ ဘုန်းကြီးကျောင်းနဲ့ ရပ်ကွက်တချို့ကို ရွှေ့ပြောင်းနေထိုင်ကြတယ်လို့ ပြောပါတယ်။
မိုးဆက်တိုက်ရွာသွန်းမှုကြောင့် ကလော၊ အောင်ပန်း၊ တောင်ကြီး၊ ရွှေညောင်၊ အေးသာယာတို့ မြို့ပေါ်က စီးကျလာတဲ့ ရေတွေဟာ အင်းလေးဒေသနဲ့ ညောင်ရွှေမြို့ပေါ်မှာ ရေလာစုပြုံတာဖြစ်ပြီး ရေကြီးရေလျှံမှုတွေ ကြုံနေရတယ်လို့ ပြောပါတယ်။
၂၀၂၅ နှစ်အတွင်း ညောင်ရွှေမြို့နယ်မှာ ပြီးခဲ့တဲ့နှစ်ကထက် ရေကြီးရေလျှံဖြစ်မယ်လို့ မိုးလေဝသက ခန့်မှန်းထားတာကြောင့် ဒေသခံတွေအနေနဲ့ စိုးရိမ်ပူပန်မှုတွေရှိနေပြီး နေရပ်ပြောင်းရွှေ့တာ၊ ရေကြီးမှုအတွက် ကြိုတင်ပြင်ဆင်တာတွေ ပြုလုပ်ကြဖို့ ညောင်ရွှေမြို့ပေါ်က ကူညီပေးနေတဲ့အမျိုးသားတစ်ဦးက တိုက်တွန်းထားပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
