မိုင်းရူပ၊ ဇူလိုင် ၁ ရက်၊ သပိတ်ကျင်း
စစ်ကောင်စီတပ်နဲ့ တော်လှန်ရေးတပ်တွေအကြား တိုက်ပွဲဖြစ်ပွားနေတဲ့ မန္တလေးတိုင်း သပိတ်ကျင်းမြို့နယ် ၆ မိုင်ကျေးရွာရွာက နေရာတချို့ကို တော်လှန်ရေးတပ်တွေက စစ်ကောင်စီတပ်ထံ ပြန်လက်လွှတ်ခဲ့ရတယ်လို့ ရှေ့တန်းသတင်းအရင်းအမြစ်တစ်ဦးက ရွှေဖီမြေကို ပြောပါတယ်။
စစ်ကောင်စီတပ်ဟာ ၆ မိုင်ကျေးရွာထဲကို လေကြောင်းတိုက်ခိုက်မှုတွေ ပြုလုပ်နေပြီး မနေ့ ဇွန်လ ၃၀ ရက် ည ၁၀ နာရီဝန်းကျင်မှာ တစ်ကြိမ်၊ ဒီနေ့ ဇူလိုင်လ ၁ ရက် မနက်ပိုင်းမှာ တစ်ကြိမ် ၆ မိုင်ရွာထဲကို စစ်ကောင်စီတပ်က လေယာဥ်နဲ့ ဗုံးကြဲတိုက်ခိုက်ခဲ့တယ်လို့ ဆိုပါတယ်။
“၅ မိုင်က စစ်ဆိုင်ထားတယ်။ ၆ မိုင်က ပြန်ပေးလိုက်ရတာ ဟုတ်တယ်ဗျ” လို့ ရှေ့တန်းသတင်းအရင်းအမြစ်တစ်ဦးက ပြောပါတယ်။
စစ်ကောင်စီထောက်ခံတဲ့ တယ်လီဂရမ်ချန်နယ်တွေမှာတော့ ၆ မိုင်ရှိ တော်လှန်ရေးတပ်တွေရဲ့ တပ်စခန်းတွေကို စစ်ကောင်စီဘက်က ဇွန်လ ၂၈ ရက်မှာ သိမ်းပိုက်နိုင်ခဲ့ပြီး ၅ မိုင်ရှိ တပ်စခန်းကို ဇွန်လ ၂၉ ရက်မှာ သိမ်းပိုက်နိုင်ခဲ့တယ်လို့ ရေးသားဖော်ပြနေကြပါတယ်။
သပိတ်ကျင်းမြို့နယ်ရှိ စစ်ကောင်စီတပ်စခန်းတွေကို တအာင်းတပ်မတော် TNLA၊ မန္တလေး PDF နဲ့ မိုးကုတ်ဗျူဟာ စတဲ့ပူးပေါင်းတပ်တွေက တိုက်ခိုက်နေတာ ဖြစ်ပါတယ်။
သပိတ်ကျင်းမြို့ကို မန္တလေး PDF နဲ့ ပူးပေါင်းတပ်တွေက ပြီးခဲ့တဲ့ ၂၀၂၄ ခုနှစ် သြဂုတ်လထဲမှာ တိုက်ခိုက်သိမ်းပိုက်နိုင်ခဲ့ပေမဲ့ မြို့အနီးရှိ စစ်ကောင်စီရဲ့ တန်းမြင့်လေ့ကျင်းရေးကျောင်း အမှတ် (၁၃)၊ ၇ မိုင်နဲ့ ကျောက်ကြီးရွာရှိ တပ်စခန်းတွေကိုတော့ သိမ်းပိုက်နိုင်ခြင်းမရှိပဲ ကျန်ရှိနေတာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
