မိုင်းအရှိုင်း၊ ဇန်နဝါရီ ၁၆ ရက်၊ သိန္နီ
ကိုးကန့်တပ်မတော် MNDAA ထိန်းချုပ်မှုအောက်မှာရှိတဲ့ ရှမ်းမြောက် သိန္နီမြို့နဲ့ တရုတ် – မြန်မာ ကုန်သွယ်ရေးလမ်းမကြီးကို တရုတ်အကူအညီနဲ့ ပြန်လိုချင်တဲ့ စစ်ကောင်စီရဲ့ တပ်သားတွေကို MNDAA က ပြန်လွှတ်ပေးခဲ့တယ်လို့ သိရပါတယ်။
TB ရောဂါရှိတဲ့ စစ်သုံ့ပန်း ၈၆ ဦးကို စစ်ကောင်စီတပ်နဲ့ MNDAA တို့ လားရှိုးမြို့ ဆင်နှစ်ကောင် ဟိုတယ်မှာ တွေ့ဆုံမှု ပြုလုပ်ပြီးတဲ့နောက် ပြီးခဲ့တဲ့ ဇန်နဝါရီ ၁၄ ရက်မှာ ပြန်လွှတ်ပေးခဲ့တာ ဖြစ်ပါတယ်။
စစ်ကောင်စီတပ်ဟာ စီးပွားရေးအရ အရေးပါပြီး ကုန်သွယ်ရေး လမ်းဆုံကျတဲ့ သိန္နီမြို့နဲ့ ကိုးကန့်ထိန်းချုပ်ထားတဲ့ တရုတ် – မြန်မာ ကုန်သွယ်ရေးလမ်းပိုင်းတွေကို ပြန်ရဖို့ MNDAA နဲ့ လားရှိုးမြို့မှာ တစ်ပတ်ကို အနည်းဆုံး တစ်ကြိမ် တွေ့ဆုံဆွေးနွေးနေကြတယ်လို့ ဆိုပါတယ်။
MNDAA နဲ့ နီးစပ်သူတစ်ဦးက “ပြန်လွှတ်တဲ့အထဲမှာ ပါသွားတဲ့ ရာထူးအခြေအနေကတော့ အတိအကျမသိရပါဘူး။ ကျန်းမာရေးမကောင်းတဲ့ သူတွေပဲ လွှတ်ပေးတာပါ။ ကျွန်တော်အမြင်က စကစတွေဖက် သိန္နီအထိ ပြန်ဆုတ်ခိုင်းတဲ့ အနေအထားမှာ စစ်သုံ့ပန်းတွေဘဲ ပြန်လွှတ်ပြီး နှစ်သိမ့်ပေးတဲ့ သဘောပါ” လို့ ရွှေဖီမြေကို ပြောပါတယ်။
သတင်းရင်းမြစ် နောက်တစ်ဦးကတော့ ပြန်လွှတ်ပေးတဲ့အထဲမှာ အဆင့်ရာထူးမခွဲဘဲ ကျန်းမာရေးချို့ယွင်းတဲ့ သူတွေကိုသာ ပြန်လွှတ်ပေးတာဖြစ်ပြီး ကျန်းမာရေးကောင်းပြီး အသက်ကြီးသူတွေကိုတောင် ပြန်မလွှတ်ပေးဘူးလို့ ဆိုပါတယ်။
MNDAA က စစ်ကောင်စီတပ်ရဲ့ စစ်သုံ့ပန်းတွေကို ပြီးခဲ့တဲ့ နိုဝင်ဘာ ၁၁ ရက်မှာ ၂၀၂ ဦးနဲ့ အောက်တိုဘာလ ၁၄ ရက်မှာ ၄၆ ဦး ပြန်လွှတ်ပေးခဲ့ဖူးပါတယ်။
စစ်ကောင်စီတပ်က တရုတ်အကူအညီနဲ့ လားရှိုးမြို့ကို ပြန်ရပြီးတဲ့နောက် သိန္နီမြို့ကိုလည်း တရုတ်အကူအညီနဲ့ ပြန်ရဖို့ တောက်လျှောက် ကြိုးပမ်းလာတာတွေ့ရပြီး ကိုးကန့်တပ် – MNDAA ဖက်ကတော့ လက်ခံခြင်းမရှိဘဲ စစ်ကောင်စီတပ်ရဲ့ စစ်သုံ့ပန်းတွေသာ ပြန်လွှတ်ပေးနေတာ တွေ့နေရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
