ရွှေဖီမြေ၊ ဇန်နဝါရီ ၂၉ ရက်၊ မယ်စဲ့
ကရင်နီ – ထိုင်းနယ်စပ် မယ်စဲ့မြို့နယ်ရှိ ကရင်နီပြည် ကြားကာလအုပ်ချုပ်ရေးကောင်စီ- IEC ရဲ့ အကျဥ်းထောင်ကနေ ထွက်ပြေးသွားတဲ့ စစ်ကောင်စီစစ်သုံ့ပန်းအပါအဝင် အကျဉ်းသားတွေထဲက ၈ ဦးကို အသေပစ်ခတ်ခဲ့ပြီး ၂ ဦး အရှင် ပြန်ဖမ်းမိခဲ့တယ်လို့ IEC က ဒီနေ့မှာ ထုတ်ပြန်လာပါတယ်။
ဇန်နဝါရီ ၁၈ ရက်မှာ ထောင်ဖောက်ထွက်ပြေးသွားတဲ့ အကျဥ်သားတွေထဲမှာ စစ်ကောင်စီ စစ်သုံ့ပန်း ၇၆ ဦး၊ မူးယစ်ဆေးဝါးကြောင့် ထောင်ကျထားသူ ၅ ဦးနဲ့ ထောင်ဝန်ထမ်း ၂ ဦးတို့ ပါဝင်တယ်လို့ IEC ရဲ့ ဒီနေ့ ဇန်နဝါရီ ၂၉ ရက် ထုတ်ပြန်ချက်မှာ ဖော်ပြထားပါတယ်။
ထွက်ပြေးသွားတဲ့သူတွေကို ဖမ်းဆီးဖို့ တော်လှန်ရေးတပ်တွေက ဇန်နဝါရီ ၁၈ ရက်ကနေ ၂၁ ရက်အထိ နယ်မြေရှင်းလင်းရေးတွေ လုပ်ဆောင်ခဲ့ပြီး ထွက်ပြေးသွားတဲ့ စစ်သုံ့ပန်းတွေဘက်က ပြန်လည်ပစ်ခတ်ခဲ့တာကြောင့် ၈ ဦးကို အသေပစ်ခတ်ခဲ့ပြီး ၂ ဦးကို အရှင်ဖမ်းမိခဲ့တယ်လို့ ဆိုပါတယ်။
ထွက်ပြေးသွားသူတွေထဲက ကျန်သူအားလုံးဟာ ထိုင်းစစ်တပ်ထံ လက်နက်ချ အဖမ်းခံခဲ့တယ်လို့ IECက ဆိုပါတယ်။
ထွက်ပြေးသွားတဲ့ အကျဥ်းတွေရဲ့ ပြောဆိုချက်နဲ့ ထိုင်းစစ်တပ်ရဲ့ အသိပေးချက်အရ ထောက်ဖောက်ပြေးဖို့ အကျဥ်းသားတွေဟာ ၃ လနီးပါးကြာ ကြိုတင်ပြင်ဆင်ခဲ့တာ တွေ့ရတယ်လို့ ဖော်ပြထားပါတယ်။
ထိုင်းနိုင်ငံဘက် ထွက်ပြေးသွားတဲ့ စစ်သုံ့ပန်း ၆၈ ဦးကို ထိုင်းစစ်တပ်က ပြီးခဲ့တဲ့ ဇန်နဝါရီ ၂၆ ရက်မှာ စစ်ကောင်စီထံ လွှဲပြောင်းပေးခဲ့ပါတယ်။
အကျဥ်သားတွေ ထောင်ဖောက်ပြေးသွားတဲ့ ဒီဖြစ်ရပ်အတွက် ကရင်နီလူထုတွေနဲ့ တော်လှန်ရေးအင်အားစုတွေကို တောင်းပန်ကြောင်း IEC က ပြောထားပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
