ရဲမာန်၊ ဇွန်လ ၉ ရက်၊ စဉ့်ကူး
မန္တလေးတိုင်း စဉ့်ကူးမြို့နယ် ကျည်တောက်ကျေးရွာက ဆေးရုံကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်ခဲ့လို့ အမျိုးသမီး ၁ ဦး သေဆုံးကာ ၃ ဦး ဒဏ်ရာရခဲ့ပြီး အဆောက်အဦး ၁ လုံး ပျက်စီးခဲ့တယ်လို့ ပြည်သူ့ကာကွယ်ရေး(ပြင်ဦးလွင်ခရိုင်) အဖွဲ့က ထုတ်ပြန်ပါတယ်။
ဒီနေ့ ဇွန်လ ၉ ရက် ၅ နာရီခွဲ၀န်းကျင်မှာ စစ်ကောင်စီက လေကြောင်းကနေ ပေါင် ၂၅၀ တစ်လုံး ကြဲချခဲ့တာဖြစ်တယ်လို့ ဆိုပါတယ်။
“စျေးလာဝယ်တဲ့အချိန်မှာ ဗုံးဆမှန်ပြီး အမျိုးသမီးတစ်ယောက်သေတယ်။ တစ်ဦးက လက်ဖြတ်လိုက်ရတယ်။ နောက် ၂ ယောက်က ပေါင်မှာ ဗုံးဆထိသွားတယ်” လို့ ပြင်ဦးလွင်ခရိုင် ပကဖရဲ့ တာဝန်ရှိသူတစ်ဦးက ရွှေဖီမြေကို ပြောပါတယ်။
စဉ့်ကူးမြို့ပေါ်ရှိ မြသိန်းတန်ဘုရားနဲ့ ဘုန်းကြီးကြောင်းကိုလည်း ပြီးခဲ့တဲ့ ဇွန်လ ၄ ရက်မှာ စစ်ကောင်စီတပ်က အလားတူ လေကြောင်းကနေ ဗုံးကြဲတိုက်ခိုက်ခဲ့တယ်လို့ ဒေသခံတွေရဲ့ ပြောပြချက်အရ သိရတယ်။
လွန်ခဲ့တဲ့ ၂၀၂၄ ဩဂုတ် ၄ ရက်မှာ စဉ့်ကူးမြို့နယ် ကံတောင်ရွာနဲ့ နွယ်ရုံရွာ၂ရွာကို ကမ္ဘာက အသုံးမပြုဖို့ ပိတ်ပင်ထားတဲ့ အတွဲလိုက် ဗုံးသီးတွေကို ကြဲချသွားလို့ ပြည်သူ ၁၃ ဦး သေဆုံးပြီး ၁၃ ဦး နဲ့အထက် ဒဏ်ရာရခဲ့တဲ့ ဖြစ်စဉ်လည်း ရှိခဲ့ဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
