မြတ်နိုး၊ ဇွန် ၄ရက်၊ ဖားကန့်
ကချင်ပြည်နယ်၊ ဖားကန့်ဒေသရှိ မနေ့ ပေါက်ကွဲမှု ဖြစ်ပွားခဲ့ရာ အနီးက ကုမ္ပဏီတစ်ခုနဲ့ ဆန်ခါဘက်က ကုမ္ပဏီတစ်ခုကို ဒီနေ့ ဇွန်လ ၄ ရက် နေ့လယ်ပိုင်းက စစ်ကောက်စီတပ်ဖွဲ့တွေက မီးရှို့ဖျက်ဆီးနေကြောင်း ဒေသခံတွေဆီက သိရပါတယ်။
“ကားမီးရှို့ဖို့ လုပ်နေတာ။ လူအင်အား ၂၀ လောက်ပါတယ်။ ဘေးမှာလည်း အကုန်လုံး ကင်းထောက်တွေနဲ့။ကားတွေကို မီးရှို့နေကြတာ” လို့ ဒေသခံတစ်ဦးက ပြောပါတယ်။
မနေ့က ပေါက်ကွဲမှု ဖြစ်တဲ့နေရာနဲ့ မျက်စောင်းထိုး ကုမ္ပဏီကို ဒီနေ့ ဇွန်လ ၄ ရက်နေ့ နေ့လယ် ၁၁ နာရီခွဲလောက် စစ်ကောင်စီတပ်တွေ ဝင်ရောက်မီးရှို့နေတာလို့ သူက ပြောပါတယ်။
“စစ်ကောင်စီတွေ မီးပြန်စရှို့နေပြီ။ ဘုန်းကြီးကျောင်းနားက အဆောင်ကိုရှို့တာ။ မနေ့က ပေါက်ကွဲမှု ဖြစ်ပွားခဲ့တဲ့ တင်အောင်ကြိုင်ကုမ္မဏီမျက်စောင်းထိုး နေရာမှာလည်း မြေစာ သယ်ကားတွေကို မီးရှို့နေပြန်ပြီ” လို့ နောက်ထပ်ဒေသခံ အမျိုးသား တစ်ဦးက ပါတယ်။
ဖားကန့် မှော်စီစာက ကုမ္ပဏီယမ်းဂိုဒေါင်နဲ့ ဆီဂိုဒေါင်ကို ဘုန်းကြီးကျောင်းမှာ တပ်စွဲထားတဲ့ စစ်ကောင်စီတပ်ဖွဲ့က မနေ့ ဇွန်လ ၃ ရက်နေ့ နေ့လယ် ၁ နာရီ မိနစ် ၂၀ ခန့်က ဒရုန်းဗုံးချ ဖောက်ခွဲခဲ့လို့ ကုမ္ပဏီ၀န်ထမ်း ၃ ဦးသေဆုံးပြီး ၃၀ ဦး ဒဏ်ရာရခဲ့တာ ဖြစ်ပါတယ်။
အဲဒီပေါက်ကွဲမှုကြောင့် ကုမ္ပဏီအဆောင် ၈ ဆောင် ပျက်စီးပြီး ဘက်ဟိုး တစ်စီး၊ ကား နှစ်စီး၊ 4 wheels အိမ်စီးကား တစ်စီး၊ SURF အိမ်စီးကား တစ်စီး၊ Dun Truck နှစ် စီး၊ ဖောက်စက် နှစ်လုံး၊ ဆီဘောက်စာ ၂ လုံး ပျက်စီးသွားပြီး ဒေသခံ ပြည်သူတွေ နေအိမ် ၃၅ လုံး၊ COC ဘုရားကျောင်း၊ AG ဘုရားကျောင်း၊ ဆောင်းချိန် ဓမ္မာရုံ ပျက်စီးသွားခဲ့ကြောင်း ဒေသခံတွေဆီက သိရပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
