လွေးလာဝ်ဇာရ်၊ ဇွန်လ ၂၇ ရက်၊ ကန့်ဘလူ
စစ်ကိုင်းတိုင်း ကန့်ဘလူမြို့နယ် ဇီးကုန်းတိုက်နယ်အတွင်းက ကျေးရွာတွေကို စစ်ကောင်စီတပ်နဲ့ ပျူစောထီးအဖွဲ့တွေက စစ်ကြောင်းထိုးတဲ့အချိန်မှာ ကျန်းမာရေးချို့ယွင်းသူတစ်ဦးအပါအဝင် ဒေသခံ ၉ ဦးကို ဖမ်းဆီးသတ်ဖြတ်သွားခဲ့တယ်လို့ ကျွန်းလှတက်ကြွလှုပ်ရှားသူများအဖွဲ့က မနေ့ ဇွန်လ ၂၆ ရက်မှာ ထုတ်ပြန်ထားပါတယ်။
ပြီးခဲ့တဲ့ ဇွန်လ ၂၃ ရက်ကနေ ၂၅ ရက်အထိ သုံးရက်အတွင်း ဝက်တို(တောင်)ရွာကနေ သပြေသာရွာနဲ့ ကျောင်းကုန်းရွာထဲကို စစ်ကောင်စီတပ် ဝင်ရောက်စီးနင်းခဲ့ချိန်မှာ ဒေသခံတွေရဲ့ တန်ဖိုးကြီးပစ္စည်းတွေ ယူဆောင်သွားတဲ့အပြင် နေအိမ်တွေကိုလည်း ၃ ရက်ဆက်တိုက် မီးရှို့သွားခဲ့တယ်လို့ ဆိုပါတယ်။
ကျွန်းလှတက်ကြွလှုပ်ရှားသူများအဖွဲ့ တာဝန်ရှိသူတစ်ဦးက “ရှောင်ကြတာ များတယ်။ ဖမ်းဆီးသတ်ဖြတ်ခံရသူတွေက ဘယ်လိုကျန်ခဲ့ပြီး ဘယ်လို ပိတ်မိကုန်ကြလည်းကို မသိဘူးပေါ့နော်။ ထွက်များ မထွက်ဘဲ နေကြတာလား။ ဒါမှမဟုတ် ပြေးနေရင်း မိကြတာလားဆိုတာ မပြောတက်ဘူး” လို့ ပြောပါတယ်။
ဖမ်းဆီသတ်ဖြတ်ခံရတဲ့သူတွေဟာ သပြေသာကျေးရွာက ဦးလှိုင်းဇာဇာ (၅၀ နှစ်)၊ ဦးအောင်နိုင် (၄၅ နှစ်)၊ ဦးတရုတ်ကြီး (၄၅ နှစ်)၊ ကိုမျိုးထက် (၃၄ နှစ်)၊ ဖိုလ်ကုန်းရွာက ဦးဝင်း ( ၅၃ နှစ်)၊ ဦးချစ်ဝင်း (၆၀ နှစ်) ကျောင်းကုန်းကျေးရွာက ကိုသိန်းတိုး (၃၇ နှစ်)၊ ဦးမြင့်မောင် (၄၅ နှစ်)နဲ့ ဦးမျိုးဆန်း ( ၄၅ နှစ်) တို့ဖြစ်ကြပြီး နှိပ်စက်ခံရသူအများစုဟာ လက်ပြန်ကြိုးတုပ်ခံထားရပြီး နောက်တစ်ဦးကတော့ မီးရှို့သတ်ဖြတ် ခံရတယ်လို့ ထုတ်ပြန်ချက်မှာ ဖော်ပြထားပါတယ်။
စစ်ကောင်စီတပ်နဲ့ ပျူစောထီးတွေက ၃ ရက်ဆက်တိုက် စစ်ကြောင်းထိုးနေတာကြောင့် သပြေသာရွာ၊ ကျောင်းကုန်းရွာနဲ့ အနီးအနားဝန်းကျင်ရွာက ဒေသခံ ၈ ထောင်ကျော် ဘေးလွတ်ရာကို ထွက်ပြေးတိမ်းရှောင်နေကြတယ်လို့ အထက်ပါ တာဝန်ရှိသူက ပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
