ရဲမာန်၊ ဇွန်လ ၂၅ ရက်၊ အောင်နန်း
ကချင်ပြည်နယ် မြစ်ကြီးနားမြို့ အောင်နန်းရပ်ကွက်မှာ စစ်ကောင်စီတပ်က လိုင်စင်မဲ့ကားတွေကို ဖမ်းစီးပြီး ကားကို ပြန်ရွေးခွင့်မပြုဘဲ သိမ်းဆည်းသွားခဲ့သလို လူကိုလည်း ဖမ်းဆီးသွားပြီး ငွေနဲ့ပြန်ရွေးခဲ့ရတယ်လို့ ကိုယ်တိုင်ကြုံတွေ့ခဲ့ရတဲ့ ဒေသခံအမျိုးသမီးတစ်ဦးက ရွှေဖီမြေကို ပြောပါတယ်။
နေ့စဉ် ည ၈ နာရီအချိန်ကစပြီး စစ်တပ်က အောင်နန်းရပ်ကွက် BOCထောင့် အေးစေတီအဝိုင်းပတ်အနားမှာရှိတဲ့ လမ်းကြားတစ်ခုမှာ စောင့်ကာ လိုင်စင်မဲ့ကားတွေကို လိုက်လံဖမ်းဆီးနေတာ ၂ ပတ်နီးပါးရှိနေပြီလို့ ပြောပါတယ်။
“ကားတော့ပြန်မပေးဘူး။ လူကတော့အချုပ်ကျတယ်။ ၂ ရက်ကနေ တစ်ပတ်ထိကျပြီး လူကိုတော့ သိန်း ၃၀ ဆယ် နဲ့ ရွေးလို့ရတယ်။ ကားကတော့ သိမ်းသွားတယ်”လို့ ဆိုပါတယ်။
ဖမ်းဆီးထားတဲ့ ကားတွေကို သိမ်းဆည်းထားတာမျိုးမဟုတ်ဘဲ စစ်ကောင်စီတပ်ဖွဲ့ဝင်တွေကိုယ်တိုင် ပြန်စီးနေတယ်လို့ ၎င်းက ဆက်ပြောပါတယ်။
ဆိုင်ကယ်ကတော့ ညဘက်မှာ ဖမ်းဆီးတာမျိုးမရှိပေမဲ့ နေ့ဘက်မှာတော့ တစ်ခါတစ်လေ ဂေါက်ကွင်းအနားမှာ စစ်ဆေးဖမ်းဆီးလေ့ရှိတယ်လို့ ၎င်းကပြောပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
