လွေးဇွန်မိုး၊ မေလ ၈ ရက်၊ ကွတ်ခိုင်
တအာင်းတပ်ထိန်းချုပ်ထားတဲ့ ကွတ်ခိုင်မြို့၊ ရပ်ကွက် (၄) ပန်းခြံထဲမှာ ပုဂ္ဂလိကဆေးရုံ ဖွင့်လှစ်ထားတဲ့ ဇီဝကမောင်ဆေးရုံက သူနာပြုအကူနဲ့ ဆေးဝါးကျွမ်းကျင်သင်တန်းကို အခမဲ့ သင်ကြားပေးသွားမယ်လို့ သိရပါတယ်။
သင်တန်းကို အခုမေလကနေ သြဂုတ်လအထိ ၄ လကြာသင်ကြားပေးသွားမှာဖြစ်ပြီး သင်တန်းတက်ရောက်ချင်သူတွေအနေနဲ့ မေလ ၁၅ ရက် နောက်ဆုံးထားပြီး ဇီဝကမောင်ဆေးရုံမှာ လူကိုယ်တိုင် လာရောက်စာရင်းပေးသွင်းရမှာ ဖြစ်တယ်လို့ ဒေသခံ အမျိုးသားတစ်ဦးက ပြောပါတယ်။
“လူမျိုး ဘာသာမရွေး လာပြီး သင်တန်းလျှောက်လို့ရတယ်။ ဒေသမှာရှိတဲ့ လူငယ်တွေကို အကုန်တက်စေချင်တယ်။ ဘာလို့လဲဆိုတော့ ဒါမျိုးက ရှားတယ်။ အဲလို ဆေးဝါးကျွမ်းကျင်တို့ သူနာပြုတို့ဆိုတာ သင်တန်းကြေးတွေပေးပြီးမှ တက်ရတာကိုး။ တခြားမြို့ တခြားဒေသကနေလည်း လာတက်လို့ရတယ်လေ။ အဓိကက သူတို့ ဒီမှာ ဆွေမျိုးတွေဘာတွေရှိတယ်။ သူတို့နေဖို့ ထိုင်ဖို့ အဆင်ပြေတယ်ဆိုရင် သင်ပေးတယ်”
သင်တန်းကို ၈ တန်းအောင်မြင်ပြီးတဲ့ ၊လူမျိုး ဘာသာ၊ ကျား၊ မ အသက် အရွယ်မရွေးတက်ရောက်နိုင်ပြီး လူဦးရေ ကန့်သတ်ထားတာမရှိဘူးလို့ ဆိုပါတယ်။
သင်တန်းပြီးသွားရင် ဆေးရုံက သင်တန်းဆင်းလက်မှတ် ပေးအပ်သွားမှာဖြစ်ပြီး သင်တန်းပြီးသွားတဲ့ သင်တန်သားတွေ အနေနဲ့ ဇီဝကမောင် ဆေးရုံမှာ အလုပ်လုပ်နိုင်သလို အခြားဆေးရုံ၊ ဆေးခန်းတွေမှာ လုပ်ချင်ရင်လည်း ဆေးရုံဘက်က ကူညီချိတ်ဆက်ဆောင်ရွက်ပေးသွားမယ်လို့ သိရပါတယ်။
