ရွှေဖီမြေ၊ ဖေဖော်ဝါရီ ၃ ရက်
ပြီးခဲ့တဲ့ ဇန်နဝါရီ တစ်လအတွင်း စစ်ကောင်စီ တပ်သားနဲ့ ရဲ ၁၃၆ ဦး အကြမ်းမဖက် အာဏာဖီဆန်ရေးလှုပ်ရှားမှု- CDM မှာ ပါဝင်လာတယ်လို့ အမျိုးသား ညီညွတ်ရေးအစိုးရ- NUG ရဲ့ ကာကွယ်ရေးဝန်ကြီးဌာနက ပြီးခဲ့တဲ့ ဖေဖော်ဝါရီ ၁ ရက်မှာ ထုတ်ပြန်ထားပါတယ်။
ပြည်သူ့ရင်ခွင်ကို ဘက်ပြောင်း ခိုလှုံလာသူ ၁၃၆ ဦးထဲ ဗိုလ်မှူး ၁ ဦး၊ ဗိုလ်ကြီး ၄ ဦး၊ ဗိုလ် ၁ ဦး၊ အရာခံဗိုလ် ၁ ဦးအပါအဝင် တပ်သား ၁၂၇ ဦးနဲ့ ရဲ ၉ ဦး ပါဝင်တယ်လို့ ဆိုပါတယ်။
အဲဒီအထဲမှာ လက်နက်နဲ့အတူ CDM လုပ်လာသူ ၈၃ ဦးရှိပြီး လက်နက် ယူဆောင်လာသူတွေကိုတော့ NUG က သတ်မှတ်ထားတဲ့ လက်နက်တန်ဖိုးအလိုက် ဂုဏ်ပြုချီးမြှင့်ငွေ ပေးအပ်ခဲ့တယ်လို့လည်း ဖော်ပြထားပါတယ်။
စစ်တပ်က အာဏာသိမ်းထားတဲ့ လေးနှစ်အတွင်း ပြည်သူ့ရင်ခွင် ခိုလှုံလာတဲ့ တပ်သားနဲ့ ရဲ စုစုပေါင်း ၁ သောင်း ၅ ထောင်နီးပါးရှိပြီး အဲဒီတပ်သားနဲ့ ရဲအတွက် NUG က လစဉ် ကျပ်သိန်း ခြောက်ထောင်ကျော် သုံးစွဲပြီး ကူညီနေတယ်လို့ ပြည်သူ့ရင်ခွင်ရဲ့ တာဝန်ရှိသူတစ်ဦးက RFA သတင်းဌာနသို့ ဖြေကြားထားပါတယ်။
စစ်ကောင်စီက စစ်မှုထမ်းအမိန့် ကြေညာချက် ထုတ်ပြန်ပြီးနောက်ပိုင်း ပြည်သူ့ရင်ခွင်ကို ခိုလှုံလာသူထဲ အတင်းအဓမ္မ လူသစ်စုဆောင်းခံရသူတွေလည်း ပါဝင်တယ်လို့ ဆိုပါတယ်။
