ရွှေဖီမြေ၊ မတ်လ ၁၄ ရက်
ရန်ပုံငွေ မလုံလောက်မှုကြောင့် မြန်မာနိုင်ငံမှာရှိတဲ့ လူဦးရေ ၁ သန်းအတွက် စားနပ်ရိက္ခာ အထောက်အပံ့တွေကို ရပ်ဆိုင်းတော့မယ်လို့ ကုလသမဂ္ဂ ကမ္ဘာ့စားနပ်ရိက္ခာအစီအစဉ်- WFP က ဒီနေ့ မတ်လ ၁၄ ရက် နေ့လယ်မှာ ထုတ်ပြန်လာပါတယ်။
WFP ဟာ ရန်ပုံငွေ လိုအပ်ချက် အလွန်ကြီးမားမှုကြောင့် ဧပြီလကစပြီးတော့ မြန်မာနိုင်ငံမှာရှိတဲ့ လူဦးရေ ၁ သန်းကျော်အတွက် စားနပ်ရိက္ခာအကူအညီ ရပ်ဆိုင်းရတော့မှာဖြစ်တယ်လို့ အသိပေး ပြောဆိုထားပါတယ်။
နိုင်ငံအတွင်း ပဋိပက္ခနဲ့ နေရပ်စွန့်ခွာ ရွှေ့ပြောင်းမှုသူကို သွားရောက်ကူညီခွင့် ကန့်သတ်ချက် တိုးမြင့်လာတာကြောင့် စားနပ်ရိက္ခာ အကူအညီ လိုအပ်ချက် ပိုမိုများပြားလာနေချိန်မှာ အခုလို အထောက်အပံ့ကို ရပ်ဆိုင်းခဲ့ရတယ်လို့ ထုတ်ပြန်ချက်ထဲ ဖော်ပြထားပါတယ်။
ရန်ပုံငွေအသစ် မရရှိရင် WFP က ထိခိုက်လွယ်မှု အမြင့်မားဆုံးဖြစ်ကြတဲ့ အသက်ငါးနှစ်အောက် ကလေး၊ ကိုယ်ဝန်ဆောင်မိခင်၊ နို့တိုက်မိခင်နဲ့ မသန်စွမ်းသူအပါအဝင် လူဦးရေ ၃ သောင်းခွဲခန့်ကိုသာ ကူညီထောက်ပံ့ပေးသွားနိုင်တော့မှာဖြစ်တယ်လို့ ပြောပါတယ်။
စားနပ်ရိက္ခာရဖို့ WFP ရဲ့ အထောက်အပံ့ကိုသာ အားထားနေရတဲ့ ရိုဟင်ဂျာ အသိုင်းအဝိုင်းအပါအဝင် ရခိုင်ပြည်နယ်အလယ်ပိုင်းမှာရှိတဲ့ နေရပ်စွန့်ခွာသူဦးရေ ၁ သိန်းကိုပါ ထိခိုက်မှာဖြစ်တယ်လို့ ဆိုပါတယ်။
ဒီနှစ်မှာ မြန်မာလူထုတွေအတွက် ရိက္ခာအထောက်အပံ့ ဆက်လက် ပေးအပ်သွားနိုင်ဖို့ WFP က အမေရိကန်ဒေါ်လာ သန်း ၆၀ ကို အရေးတကြီး လိုအပ်နေပါတယ်။
စားနပ်ရိက္ခာ လိုအပ်မှု အမြင့်ဆုံးဖြစ်ကာ အခက်ခဲဆုံးရာသီချိန်ဖြစ်တဲ့ ဇူလိုင်လကနေ စက်တင်ဘာလအတွက် တွေးမျှော်ကာ အရေးပေါ်အစီအစဉ်အနေနဲ့ လာမယ့် လတွေကို စားနပ်ရိက္ခာ ပြတ်တောက်နိုင်မယ့် လူဦးရေ ၃ သိန်းကို ပြန်လည်ပြီး အထောက်အပံ့ ပေးသွားနိုင်ဖို့အတွက် ဦးစားပေး ကြိုးပမ်းသွားမယ်လို့လည်း ဆိုပါတယ်။
မြန်မာနိုင်ငံမှာ လူသားချင်းစာနာမှုဆိုင်ရာ လိုအပ်ချက်နဲ့ တုံ့ပြန်ရေးအစီအစဉ်အရ လက်ရှိ မြန်မာနိုင်ငံမှာ လူဦးရေ ၁၅ ဒဿမ ၂ သန်းခန့်က တစ်နေ့တာ စားနပ်ရိက္ခာ လိုအပ်ချက်ကို မပြည့်မီနိုင်တဲ့အရေး ကြုံနေရတယ်လို့ ပြောဆိုထားပါတယ်။
