အိုက်ပွီး၊ ဇန်နဝါရီ ၉ ရက်၊ ရမ်းဗြဲ
အာရက္ခတပ်တော်- AA ထိန်းချုပ်ထားတဲ့ ရခိုင်ပြည်နယ် ရမ်းဗြဲမြို့နယ် ကျောက်နီမော်ရွာကို စစ်ကောင်စီတပ်က လေကြောင်းကနေ ဗုံးကြဲတိုက်ခိုက်လို့ လူ ၄၀ ကျော် သေဆုံးပြီး ၂၀ ကျော် ဒဏ်ရာ ရရှိခဲ့တယ်လို့ ဒေသခံတွေဆီက သိရပါတယ်။
စစ်တပ်က တိုက်ပွဲ ဖြစ်ပွားခြင်းမရှိဘဲ အရပ်သားတွေ နေထိုင်တဲ့ ကျောက်နီမော်ရွာကို မနေ့ ဇန်နဝါရီ ၈ ရက် နေ့လယ် ၁ နာရီမှာ လေကြောင်းကနေ ဗုံးကြဲတိုက်ခိုက်ခဲ့တာ ဖြစ်ပါတယ်။
“ထိခိုက်သေဆုံးမှု စာရင်းလောက်ပဲ သိရသေးတယ်။ ဘယ်သူတွေ ပါလဲဆိုတာတော့ မသိရသေးဘူး။ ဒဏ်ရာ ရတဲ့သူတွေကို အနီးအနားက ဆေးရုံ ဆေးခန်းတွေမှာ ပို့ဆောင်ထားပြီး ဆေးကုသနေပါတယ်” လို့ ဒေသခံတစ်ဦးက ရွှေဖီမြေသို့ ပြောပါတယ်။
ဒါ့အပြင် ကျောက်နီမော်ရွာ မြောက်ပိုင်းရပ်ကွက်၊ အလယ်ပိုင်းရပ်ကွက်နဲ့ တောင်ပိုင်းရပ်ကွက်က အရပ်သားနေအိမ် ၅၀၀ ထက်မနည်းလည်း မီးလောင်ပျက်စီးသွားခဲ့ပါတယ်။
ရမ်းဗြဲမြို့ကို AA က ပြီးခဲ့တဲ့ ၂၀၂၄ ခုနှစ် မတ်လ ၁၁ ရက်မှာ တိုက်ခိုက်သိမ်းပိုက်ပြီး ထိန်းချုပ်ထားတာလည်း ဖြစ်ပါတယ်။
ရခိုင်ပြည်နယ်မှာ စစ်တပ်က AA သိမ်းပိုက်ထိန်းချုပ်ထားတဲ့ မြို့ ရွာတွေကို လေကြောင်းကနေ တိုက်ခိုက်မှု ဆက်တိုက် ပြုလုပ်နေပါတယ်။
ပြီးခဲ့တဲ့ ဇန်နဝါရီ ၃ ရက်ကလည်း မြေပုံမြို့နယ် ကမ်းထောင့်ကြီးမြို့ကို လေကြောင်းကနေ တိုက်ခိုက်ခဲ့တာကြောင့် အမျိုးသမီးတစ်ဦး သေဆုံးခဲ့ပါတယ်။
