မိုင်းအရှိုင်း၊ ဧပြီ ၂၃ ရက်၊ ရွှေဖီမြေ
ရှမ်းတပ်သားသုံးဦးက အမျိုးသမီးငယ်တစ်ယောက်ကို လိမ်လည်ဖမ်းဆီးကာ မဖွယ်မရာ စစ်ဆေးပြီး ချုပ်နှောင်နေတဲ့ ရုပ်သံဖိုင် လူမှုကွန်ရက်ပေါ် ပြန့်နှံ့နေပါတယ်။
စကားပြောစက်ပါတဲ့ တပ်သားတစ်ယောက်က လက်မှာ မူးယစ်ဆေးဝါးတစ်ထုပ်ကို လက်ကြားထဲ ညှပ်ထားကာ အမျိုးသမီးငယ်ရဲ့ လွယ်အိတ်ထဲ စစ်ဆေးပြီး မူးယစ်ဆေးဝါး သုံးစွဲတယ်ဆိုကာ လည်ပင်းကို ကြိုးစွပ်ချည်နှောင်လိုက်တာပဲ ဖြစ်ပါတယ်။
အဲဒီအမျိုးသားက “နင်က ဘိန်း ဘယ်မှာဝယ်တာလဲ”လို့ မေးလိုက်တဲ့အချိန်မှာ အမျိုးသမီးငယ်က “ဘယ်မှာမှ မဝယ်ဘူး”လို့ ပြန်လည် ပြောဆိုခဲ့ပါတယ်။
အမျိုးသမီးသုံးယောက်က ရှမ်းစကားကို ကျွမ်းကျင်စွာ မပြောနိုင်တာနဲ့ တအာင်းရူစိင်းမျိုးနွယ်တွေရဲ့ ပြောဆိုတဲ့အသုံးအနှုန်း ဖြစ်တာကြောင့် တောင်ပိုင်းရှိ တအာင်းရူစိင်းဖြစ်နိုင်ကြောင်း ယူဆနိုင်ပါတယ်။
ကျန်တဲ့ အမျိုးသမီးနှစ်ယောက်ကို ဘယ်သွားမလဲလို့ ဗီဒီယို ရိုက်တဲ့သူ မေးတဲ့အခါမှာ “ကိန်ခမ်း”ဘက်ကို သွားမယ်လို့ ပြန်လည်ဖြေကြားချက်အရ ဖြစ်စဉ်နေရာဟာ ကျိုင်းတောင်း သို့မဟုတ် ခိုလမ်ဘက်ရှိ ကျိုင်းခမ်းရွာတစ်ဝိုက်ကလို့ ပြောဆိုနိုင်ပေမဲ့ ရွှေဖီမြေက ဆက်လက် စုံစမ်းဆဲ ဖြစ်ပါတယ်။
စစ်ဆေးရာမှာလည်း အမျိုးသမီးရဲ့ ခန္ဓာကိုယ်ကို မဖွယ်မရာ ထိတွေ့ပြီး စစ်ဆေးတာကို ရုပ်သံမှာ တွေ့ရပြီးတော့ စစ်ဘောင်းဘီ ဝတ်ထားတဲ့သူဟာ ဘယ်အဖွဲ့အစည်းလဲဆိုတာကို အတည်မပြုနိုင်သေးပါဘူး။
