ရွှေဖီမြေ၊ မတ်လ ၂၉ ရက်၊ ပန်ဆန်း
ငလျင်ဘေးသင့် မြန်မာပြည်သူတွေကို “ဝ”ပြည် သွေးစည်းညီညွတ်ရေး တပ်မတော်- UWSA က ကျပ် သန်း ၂ ထောင် ကူညီမယ်လို့ ဆိုပါတယ်။
မနေ့ မတ်လ ၂၈ ရက် နေ့လယ်ပိုင်းက အင်အားပြင်းတဲ့ ငလျင်လှုပ်ခတ်မှုကြောင့် ရှမ်းပြည်နယ်၊ မန္တလေး၊ စစ်ကိုင်းနဲ့ နေပြည်တော်အပါအဝင် အခြားဒေသမှာလည်း ထိခိုက်ပျက်စီးမှုများပြီး လူထိခိုက်သေဆုံးတာလည်း များနေပြီးတော့ သေဆုံးမှု ဆက်လက် မြှင့်တက်နေပါတယ်။
လက်ရှိ ဖြစ်ပေါ်နေတဲ့ ပဋိပက္ခ အခြေအနေတွေကို ခေတ္တရပ်စဲကြပြီး ကူညီကယ်ဆယ်ရေး လုပ်ငန်းတွေမှာ အဖွဲ့အစည်းအားလုံး အတူပူးပေါင်းပါဝင်ကြဖို့ကိုလည်း တိုက်တွန်းထားပါတယ်။
ငလျင်ဘေးသင့်သူတွေအတွက် UWSA က ဝမ်းနည်းကြောင်းသဝဏ်လွှာနဲ့အတူ ကျပ် သန်း ၂ ထောင်ကူညီမယ်လို့ UWSA ရဲ့ ပြင်ပဆက်ဆံရေးရုံး တာဝန်ခံ ဦးညီရန်းက မနေ့ မတ်လ ၂၈ ရက် ညနေပိုင်းက ၎င်းရဲ့ လူမှုကွန်ယက်မှတဆင့် အသိပေးထားပါတယ်။
ငလျင်ဒဏ်ကြောင့် လူ ရာနဲ့ချီ အသက်ဆုံးရှုံးခဲ့ရပြီး နေအိမ် အဆောက်အုံလည်း ပျက်စီးဆုံးရှုံးမှု များတာကြောင့် ကူညီကယ်ဆယ်ရေးလုပ်ငန်း အရေးပေါ် လိုအပ်နေကြပါတယ်။
ဒါ့အပြင် ငလျင်ဘေးအတွက် အမေရိကန်က အကူအညီ ပေးသွားမယ်လို့ သမ္မတ ဒေါ်နယ်ထရမ့်က ပြောကြားထားပြီး တရုတ်နိုင်ငံ ယူနန်ပြည်နယ်က ကယ်ဆယ်ရေးနဲ့ဆေးကုသမှုအဖွဲ့တစ်ခုက ငလျင်ဘေးသင့်သူအတွက် အကူအညီပေးဖို့ ဒီနေ့ မတ်လ ၂၉ ရက် မနက်ပိုင်းက မြန်မာဘက် ရောက်ရှိလာတယ်လို့ သိရပါတယ်။
