ပို့လဘား၊ မတ်လ ၂၇ ရက်၊ မိုင်းမော
“ဝ”ဒေသ မိုင်းမောမြို့မှာ လူသတ်မှု ကျူးလွန်သူကို “ဝ”ပြည် သွေးစည်းညီညွတ်ရေး တပ်မတော်- UWSA က သေဒဏ် ချမှတ်ခဲ့တယ်လို့ သိရပါတယ်။
ပြီးခဲ့တဲ့ ၂၀၂၄ ခုနှစ် စက်တင်ဘာ ၉ ရက်မှာ အသက် ၂၄ နှစ်အရွယ် ချိန်ဆိုင်တောင်းဟာ သူငယ်ချင်းနဲ့အတူ မူးယစ်ဆေးဝါး သုံးစွဲပြီး စကားများ ရန်ဖြစ်ခဲ့တာပဲ ဖြစ်ပါတယ်။
ဖြစ်စဉ်အခြေနေသိရှိသူ အမျိုးသမီးတစ်ဦးက “သူတို့နှစ်ယောက် ဆေးအတူသုံးကြတယ်။ ပြီးမှ အချင်းချင်း စကားများရန်ဖြစ်တာပေါ့။ သူ့ဘေးမှာရှိတဲ့ သံချောင်းကို ယူပြီး သူ့သူငယ်ချင်းကို ရိုက်လိုက်တာ။ အဲမှာဘဲ ပွဲချင်းသေဆုံးသွားတယ်။ ဆေးသုံးထားတယ်ဆိုတော့ ဆေးကြောင်တာလည်း ပါမယ်” လို့ ပြောပါတယ်။
လူသတ်မှု မြောက်တာကြောင့် ပြစ်မှုကို သေချာစိစစ်ပြီးနောက် ၂၀၂၅ မတ်လမှာ မိုင်းပေါက်မြို့ တရားစီရင်ရေးကွင်းမှာ သေဒဏ် ချမှတ်ခဲ့တယ်လို့ ဆိုပါတယ်။
“အဲဒီပြစ်မှုကို လိုက်ရင်းလိုက်ရင်းနဲ့ အဲကြားမှာ ကြာသွားတာပေါ့။ သေဒဏ် ချမှတ်လိုက်တဲ့နေ့က သေချာမသိပေမဲ့ သူတို့သတင်းထုတ်ပြန်တဲ့နေ့က ၂၄ ရက်နေ့ပေါ့နော်။ ဒီမတ်လထဲပဲ ဖြစ်မှာပေါ့” လို့ သူမက ဆက်ပြောပါတယ်။
ပြစ်မှု ကျူးလွန်တဲ့ အမျိုးသားဟာ ရဲဝန်ထမ်း ဖြစ်တဲ့အပြင် လူသတ်မှု မကျူးလွန်ခင်မှာ ခိုးမှု၊ လိမ်လည်မှုနဲ့ မူးယစ်ဆေး သုံးစွဲမှုကိုလည်း ကျူးလွန်ခဲ့ဖူးတယ်လို့ ဆိုပါတယ်။
ပြီးခဲ့တဲ့ ၂၀၂၄ အောက်တိုဘာ ၃၀ ရက်ကလည်း ဟိုပန်မြို့မှာ လူသတ်မှု ကျူးလွန်သူကို သေဒဏ် ချမှတ်ခဲ့ဖူးပါတယ်။
