လွေးထွေး၊ မေလ ၂၉ ရက်၊ မိုးကုတ်
တအာင်းတပ်-TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ ရပ်ကွက်တစ်ခုမှာ ဦးလေးဖြစ်သူက တူမဖြစ်သူကို အဓမ္မပြုကျင့်တဲ့ ဖြစ်စဉ်ဖြစ်ခဲ့ကြောင်း ကိုယ်တိုင်ကြုံတွေ့ခဲ့ရသူ အမျိုးသမီးက ရွှေဖီမြေကို ပြောပါတယ်။
ဖြစ်စဉ်ဟာ ပြီးခဲ့တဲ့ မေလ ၂၆ ရက် ည ၁၀ နာရီ ဝန်းကျင်မှာ ဖြစ်ပွါးခဲ့တာဖြစ်ပြီး တူမဖြစ်သူက အိမ်ရဲ့ အိပ်ခန်းထဲအိပ်နေချိန် ဦးလေးက ဝင်လာပြီးတော့ ခေါင်းအုံးနဲ့ဖိပြီး အဓမ္မ ပြုကျင့်ခဲ့တဲ့အပြင် တခြားသူကိုပြန်ပြောပြပါက သတ်ပစ်မယ်လို့လည်း ခြိမ်းခြောက်ခဲ့တာ ဖြစ်ပါတယ်။
ကာယကံရှင်အမျိုးသမီးက “သမီးတို့အိမ်က ကပ်ရပ်ဘဲဆိုတော့။ အဲနေ့သူက သူ့ကလေးနေမကောင်းဘူးဆိုပြီး ကျမတို့အိမ်မှာ သူ့ကလေးနဲ့အတူ ကျမဘေးခန်းမှာ လာအိပ်တာ။ ကျမအိပ်ပျော်နေတဲ့အချိန် ဝင်လာတာ။ ကျမအဝတ်ကိုချွတ်ဖို့ လုပ်တဲ့အချိန် ကျမလန့်လို့အော်တာကို မအော်နဲ့လို့ပြောပြီး ခေါင်းအုံးနဲ့ မျက်နှာကိုဖိလိုက်တာ။ အခုက သူထွက်ပြေးနေတယ်” လို့ ပြောပါတယ်။
ကျူးလွန်သူအမျိုးသားဟာ ဦးလေးဖြစ်သူ အသက် ၄၀ ဝန်းကျင် ဦးကျော်မိုးရွှေ ဖြစ်ပြီး ကျူးလွန်ခံရသူ အမျိုးသမီးဟာ အသက် ၁၇ နှစ်အရွယ် မပျော် (အမည်လွှဲ) ဖြစ်ပါတယ်။
ဒါ့အပြင် ပြီးခဲ့တဲ့ ၂၀၂၀ ခုနှစ်ကလည်း ဦးလေးဖြစ်သူရဲ့ အဓမ္မပြုကျင့်ဖို့ ကြံစည်တာကိုခံခဲ့ရပေမဲ့ အော်ဟစ် အကူအညီတောင်းလို့ လွှတ်မြောက်ခဲ့တယ်လို့လည်း ကျူးလွန်ခံရသူ အမျိုးသမီးက ဆိုပါတယ်။
အဲဒီဖြစ်စဉ်နဲ့ပတ်သက်ပြီး သက်ဆိုင်ရာတွေကိုလည်း တိုင်ကြားထားသလို အဆင့်ဆင့်စစ်ဆေးမှုတွေလည်း ပြုလုပ်နေတယ်လို့ အမျိုးသမီးရဲ့ မိသားစုဝင်တွေက ပြောပါတယ်။
အလားတူ ပြီးခဲ့တဲ့ ဧပြီ ၁၈ ရက်ကလည်း တအာင်းဒေသ နမ့်ဆန်မြို့နယ်မှာ အသက် ၅ နှစ်အရွယ် ကလေးငယ်ကို အစ်ကိုဝမ်းကွဲတော်စပ်သူက အဓမ္မပြုကျင့်ခဲ့တဲ့ ဖြစ်စဉ်ဖြစ်ပွားခဲ့ဖူးပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
