ယာရူစိင်၊ ဧပြီ ၂၉ ရက်၊ နမ့်လန်
ရှမ်းမြောက် သီပေါမြို့နယ် နမ့်လန်မြို့မှာရှိတဲ့ စစ်ကောင်စီတပ် စစ်ဆေးရေးဂိတ်မှာ တအာင်းအမျိုးသမီး ၂ ဦးကို ဖမ်းဆီးထားကာ တစ်ဦးကို ငွေ ၃ သိန်းတောင်းပြီး ပြန်လွှတ်ပေးခဲ့တယ်လို့ ကာယကံရှင်ဖြစ်သူ အမျိုးသမီးတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဧပြီ ၂၆ ရက်က အမျိုးသမီး ၂ ဦးဟာ နေရပ်ဖြစ်တဲ့ သီပေါမြို့ကို လာနေချိန် နမ့်လန်မြို့မှာရှိတဲ့ စစ်ကောင်စီ စစ်ဆေးရေးဂိတ်တစ်ခုမှာ ဖမ်းဆီးခံခဲ့ရတယ်လို့ ဆက်ပြောပါတယ်။
“ရွာဘက်မှာ အလုပ်ရှိလို့ သွားတာပါ။ အလုပ်ကိစ္စပြီးတော့ သီပေါမြို့ကို ပြန်မယ်ပေါ့။ နမ့်လန်ဂိတ်ရောက်တော့ မှတ်ပုံတင်ပြရတယ်။ ပလောင်လားဆိုပြီးမေးတော့ ခဏစောင့်ခိုင်းသေးတယ်။ ဘာကိစ္စနဲ့ နမ့်လန်ဘက်ကိုလာတာလဲပေါ့။ အဲတာနဲ့ပဲ ရစ်လာတယ်။ ဂိတ်စောင့်က ၂ ယောက်ပဲရှိတာ သူတို့က လုပ်စားနေတာလား မသိဘူး”
စစ်ကောင်စီတပ်က တောင်းတဲ့ ငွေပမာဏကို ချက်ချင်းပေးနိုင်တာကြောင့် ဧပြီ ၂၆ ရက်မှာပဲ ပြန်လွှတ်ပေးလိုက်တယ်လို့ ဖမ်းဆီးခံခဲ့ရတဲ့ ကာယကံရှင်ဖြစ်သူက ဆက်ပြောပါတယ်။
နမ့်လန်မြို့မှာရှိတဲ့ စစ်တပ်ဂိတ်ဟာ ခရီးသွားလာသူထဲက တအာင်းလူထုတွေကိုသာ စစ်ဆေးရေး ပိုတင်းကြပ်နေကြောင်း ဒေသခံတွေရဲ့ ပြောပြချက်အရ သိရပါတယ်။
အလားတူ ပြီးခဲ့တဲ့ ဖေဖော်ဝါရီ ၁၃ ရက်က လောက်ကိုင်မြို့ဘက် အလုပ်လုပ်ဖို့သွားတဲ့ တအာင်းလူငယ် ၃ ဦးကို အဲဒီစစ်ကောင်စီတပ်က ဖမ်းဆီးကာ တစ်ဦးကို ငွေ ၄ သိန်း တောင်းပြီး ပြန်လွှတ်ပေးခဲ့ပါတယ်။
ပြီးခဲ့တဲ့ ဖေဖော်ဝါရီ ၂၄ ရက်ကလည်း လင်မယား ၂ ဦးဟာ နမ္မတူမြို့မှာရှိတဲ့ သမီးဖြစ်သူဆီ အလည် လာနေချိန်မှာပဲ ဖမ်းဆီးခံခဲ့ရပြီး စစ်ကောင်စီဂိတ်ကို ငွေ ၆ သိန်း ပေးကာပြန်လည်လွှတ်မြောက်လာခဲ့ပါတယ်။
