ယာရူစိင်၊ ဒီဇင်ဘာ ၁၀ ရက်၊ သီပေါ
စစ်ကောင်စီတပ် ပြန်လည်ထိန်းချုပ်နေတဲ့ ရှမ်းမြောက် သီပေါမြို့မှာ တော်လှန်ရေးအင်အားစုတွေကို ကူညီထောက်ပံ့တယ်ဆိုတဲ့ စွပ်စွဲချက်နဲ့ ဒေသခံအမျိုးသမီး ၂ ဦး ထပ်မံဖမ်းဆီးခံရတယ်လို့ ဒီဖြစ်စဉ်ကို သ်ိရှထားတဲ့ အမျိုးသားတစ်ဦးက ရွှေဖီမြေကို ပြောပါတယ်။
ပြီးခဲ့တဲ့ ဒီဇင်ဘာလ ၂ ရက်နေ့မှာ သီပေါမြို့ မြို့လယ်ရပ်ကွက်က အသက် ၂၄ နှစ်အရွယ်နဲ့ အသက် ၃၂ နှစ်အရွယ် အမျိုးသမီးနှစ်ဦးတို့က ဖမ်းဆီးစစ်ဆေးခံခဲ့ရတာဖြစ်ပြီး ဒီနေ့ဒီချိန်ထိ ပြန်လွတ်လာတာ မရှိသေးဘူးလို့ သိရပါတယ်။
“သူတို့ နှစ်ယောက်လုံးက ပလောင်ပဲ။ နောက်တစ်ယောက်က သူ့ရည်းစားကောင်လေးက ပလောင်စစ်သားထဲကမလို့ ဖမ်းသွားတယ်လို့ သိရတယ်။ စစ်တပ်က ဒီလိုဖမ်းတယ်ဆိုတာလည်း သတင်းပေးထင်နေလို့ပါ” လို့ ဖြစ်စဉ်သိရှိသူ အမျိုးသားက ပြောပါတယ်။
သီပေါမြို့ကို စစ်ကောင်စီတပ် ပြန်ထိန်းချုပ်ပြီးချိန်ကစပြီး တအာင်းတပ် TNLA၊ PDF တွေနဲ့ ဆက်စပ်မှုရှိတယ်ဆိုတဲ့ စွပ်စွဲချက်နဲ့ ဒေသခံတွေနဲ့ ကျေးရွာတာဝန်ရှိသူတွေကို ဖမ်းဆီးတာတွေ ဆက်တိုက်လုပ်ဆောင်လာတာ ဖြစ်ပါတယ်။
TNLA ရဲ့ အမှတ်တံဆိပ်၊ အလံ၊ ပြက္ခဒိန်၊ တအာင်းထီလက်မှတ်၊ ဓာတ်ပုံ စတဲ့ပစ္စည်းတွေကို တွေ့ရှိရင်လည်း TNLA နဲ့ ဆက်စပ်တယ်ဆိုပြီး စစ်ကောင်စီတပ်က လိုက်လံဖမ်းဆီးစစ်ဆေးနေတာ ဖြစ်ပါတယ်။
စစ်ကောင်စီတပ်ရဲ့ ထိန်းချုပ်မှုအောက် ပြန်ရောက်နေတဲ့ ရှမ်းမြောက်က နောင်ချို၊ ကျောက်မဲနဲ့ သီပေါ စတဲ့မြို့နယ်တွေမှာ တော်လှန်ရေးတပ်ဖွဲ့ဝင်တွေနဲ့ ဆက်စပ်မှုရှိတယ်ဆိုပြီး စစ်ကောင်စီတပ်က ဒေသခံတွေကို ဆက်တိုက် ဖမ်းဆီးလာတာလို့ ဒေသခံတွေ ပြောပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
