မိုင်းပန်ပျော်၊ မေလ ၁၄ ရက်၊ ပန်ဆန်း
“ဝ” ပြည်သွေးစည်းညီညွတ်ရေးပါတီ-UWSA ဗဟိုဌာနချုပ်ဖြစ်တဲ့ ပန်ဆန်းမြို့မှာ လက်နက်ခိုးပြီးရောင်းခဲ့တဲ့ UWSA ရဲ့ ထောက်ပို့တပ်သား ၂ ဦးကို ၁ ဦးက လူမြင်ကွင်းရှေ့မှာ သေဒဏ်ချမှတ်ခံရပြီး နောက်တစ်ဦးက ထောင်ဒဏ်နှစ်ရှည်ချမှတ်ခံရတယ်လို့ ဒေသခံတွေဆီက သိရှိရပါတယ်။
ဒီနေ့ မေလ ၁၄ ရက် မနက် ၈ နာရီဝန်းကျင် ပန်ဆန်းမြို့မှာ တရားစီရင်တဲ့အခမ်းအနားကိုပြုလုပ်ပြီး မြို့ပေါ်ရှိ ဒေသခံတွေခေါ်ပြီး တရားစီရင်တဲ့ အခမ်းအနားကို လာရောက်ကြည့်ရှူခဲ့တယ်လို့ ဖြစ်စဉ်သိရှိသူအမျိုးသမီးတစ်ဦးက ရွှေဖီမြေကို ပြောပါတယ်။
“ဒီကနေ့ ၈ နာရီ ဝန်းကျင်မှာပေါ့နော်။ တရားစီရင်တယ်။ အဲ့မှာ ထောက်ပို့တပ်သားနှစ်ဦး ပါတယ်။ တစ်ယောက်ကတော့ သူကိုယ်တိုင်သွားခိုးယူတဲ့လူပေါ့ နောက်တစ်ယောက်ကျတော့ ကြံရာပါတာ။ အဲ့ဒီ ၂ ယောက်ထဲမှာ တကယ်လုပ်တဲ့လူကို သေဒဏ်ချလိုက်တယ် ကြံရာပါတာကိုတော့ နှစ်ရှည်ထောင်ဒဏ် ၁၆ နှစ် ကနေ ၂၀ နှစ်ဝန်းကျင်အထိချမှတ်ခံရတယ်။ တရားစီရင်ပွဲက ပန်ဆန်းမှာလုပ်တော့ ပန်ဆန်းမှာနေတဲ့ ဒေသခံ မိဘပြည်သူတွေအပြင် ကျောင်းသူကျောင်းသားတွေအားလုံး လာပြီးတော့ကြည့်ကြတယ်”
တရားစီရင်ခံရတဲ့ ထောက်ပို့တပ်သား ၂ ဦးဟာ UWSA ရဲ့ ထောက်ပို့ရုံးက လက်နက်တွေကိုခိုးယူပြီး တအာင်းတပ်မတော်-TNLA ဆီကို ရောင်းခဲ့တယ်လို့ သတင်းထွက်နေပါတယ်။
UWSA ဘက်ကတော့ ထောက်ပို့တပ်သား ၂ ဦးက ခိုးယူတဲ့လက်နက်တွေကို တိုင်းရင်းသားလက်နက်ကိုင်အဖွဲ့တွေဆီကိုသာ ရောင်းချခဲ့ပြီး ဘယ်အဖွဲ့လည်းဆိုတာကိုတော့ ထုတ်ပြန်ပြောဆိုတာမျိုးမရှိသေးပါဘူး။
