ပျားကြီး၊ မတ် ၃ရက်၊ ရန်ကုန်
ရန်ကုန်တိုင်း၊ ဒေါပုံမြို့နယ်မှာ စစ်မှုထမ်းဖို့ စာရင်းလိုက်လံကောက်နေချိန်မှာ ဓာတ်ဆီလောင်းမီးရှို့ခံခဲ့ရသူ ၂ ဦးထဲက ဆယ်အိမ်မှုးဖြစ်သူလည်း ထပ်မံ သေဆုံးသွားပြီလို့ ဒေသခံတွေက ပြောပါတယ်။
ပြီးခဲ့တဲ့ ဖေဖော်ဝါရီလ ၁၂ ရက်က ဒေါပုံမြို့နယ်၊ ကြည်စုရပ်ကွက်၊ ဓမ္မရိပ်သာလမ်းမှာ စစ်မှုထမ်းဖို့စာရင်းလိုက်လံကောက်ယူနေချိန် နေအိမ်အတွင်းကဓာတ်ဆီလောင်းပြီး မီးရှို့ခဲ့တာကြောင့် စစ်ကောင်စီကခန့်ထားတဲ့ ရာအိမ်မှူးဖြစ်သူ အောင်မိုးနဲ့ ဆယ်အိမ်မှူးဖြစ်သူ နှင်းသီတာတို့ မီးလောင်ဒဏ်ရာရရှိခဲ့တာဖြစ်ပြီး ရရှိထားတဲ့ဒဏ်ရာတွေနဲ့သေဆုံးသွားတာ ဖြစ်ပါတယ်။
“အောင်မိုးက စောစောသေသွားတယ်။ ဒီနေ့မနက်တော့ နှင်းသီတာပါ ထပ်သေသွားပြီ။ အိမ်မှာအခုနာရေးပြင်နေပြီ။ အလောင်းကပုပ်ပွပြီး အရည်တွေတောက်လျောက်ကျနေလို့ မနက်ဖြန်ချက်ချင်းမသာချဖို့လုပ်နေတယ်”လို့ ဒေသခံတစ်ဦးက ရွှေဖီမြေကို ပြောပါတယ်။
မီးရှို့ခံခဲ့ရသူတွေထဲက ရာအိမ်မှူးဖြစ်သူ အောင်မိုးဟာဖေဖော်ဝါရီလ ၂၆ ရက်နေ့ကတည်းက မီးလောင်ဒဏ်ရာတွေကြောင့် သေဆုံးခဲ့တာဖြစ်ပြီး နှင်းသီတာကတော့ ဒီနေ့မနက်ပိုင်းမှ နေအိမ်မှာသေဆုံးခဲ့တာဖြစ်ပါတယ်။
အဲ့ဒီလို အဓမ္မစစ်မှုထမ်းစာရင်း လိုက်လံကောက်ယူနေတဲ့ ရာအိမ်မှူးနဲ့ဆယ်အိမ်မှူးတို့ကို ဓာတ်ဆီနဲ့လောင်းပြီးမီးရှို့ခဲ့တဲ့ တရားခံကို စစ်ကောင်စီက ဖမ်းယူနိုင်ခြင်း မရှိသေးပါဘူး။
