မြတ်နိုး၊ စက်တင်ဘာ ၂၂ ရက်၊ ဆော့လော်
ကချင်ပြည်နယ် ဆော့လော်မြို့နယ် လာချင်ကျေးရွာအုပ်စု လာချင်ခေါ် လန်ဆယ်မှာ ဒီနေ့ စက်တင်ဘာ ၂၂ ရက် နေ့လယ် ၂ နာရီခန့်က စစ်ကောင်စီတပ် လေကြောင်းကနေ ဗုံးကြဲတိုက်ခိုက်လို့ အရပ်သား နှစ်ဦး ထိမှန်သေဆုံးခဲ့တယ်လို့ ဒေသခံတွေဆီက သိရပါတယ်။
“ဟုတ်တယ်။ ခုဏက ၂ နာရီကျော်ခန့်က ဒီမြောက်ဘက် ပျံတက်လာတဲ့ ဖိုက်တာ ၁ စီးနဲ့ လာကြဲ သွားတာ” လို့ ဒေသခံ အမျိုးသားတစ်ဦးက ပြောပါတယ်။
တာဝန်ရှိသူတွေက ဒေသခံတွေအနေနဲ့ လေကြောင်းအန္တရာယ် သတိရှိဖို့ သတိပေး ပြောဆိုထားတာ ရှိပေမဲ့ ဒေသခံတချို့က မကြုံဖူးတော့ သတိမထားကြဘူးလို့ ဆိုပါတယ်။
“တပ်အချင်းချင်း၊ ရန်သူအချင်းချင်းပဲ ကြဲလေ။ အဲလို ရမ်းသမ်း ကြဲနေရင်တော့ ဘယ်မှာပုန်းပုန်း လွတ်မှာမဟုတ်ဘူး။ ထိနေမှာပဲ” လို့ ဒေသခံ အမျိုးသမီးတစ်ဦးက ပြောပါတယ်။
လေကြောင်းနဲ့ ဗုံးကြဲခဲ့တာကြောင့် အရပ်သား နေအိမ်တစ်အိမ် ထိမှန်ကာ ဒေသခံ အမျိုးသမီးတစ်ဦးနဲ့ အမျိုးသားတစ်ဦး သေဆုံးခဲ့တာလို့ သူက ပြောပါတယ်။
စက်တင်ဘာ ၁၉ ရက်ကစ ခေါင်လန်ဖူးဘက်ကနေ လန်ဆယ်ဘက် ဦးတည်ပြီး စစ်ကြောင်း ထိုးနေတဲ့ စစ်တပ်၊ ပြည်သူ့စစ် ပူးပေါင်းတပ်နဲ့ KIA ပူးပေါင်းတပ်ဖွဲ့တို့အကြား လမ်းမှာ တိုက်ပွဲ ဖြစ်ပွားနေတာ ဖြစ်ပါတယ်။
လန်ဆယ်ဒေသကိုတော့ ပြီးခဲ့တဲ့ ၂၀၂၄ နှစ်ကုန်ပိုင်းက KIA နဲ့ ပူးပေါင်းတော်လှန်ရေးတပ်ဖွဲ့က သိမ်းပိုက်ကာ ထိန်းချုပ်ထားတာပဲ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
