ကျိုင်းတုံ-တောင်ကြီးလမ်း စပယ်ရှယ်တောင်မှာ ကားမှောက်၊ ၂ ဦး သေဆုံးပြီး ၇ ဦး ဒဏ်ရာရ

လွေးထွေး၊ နိုဝင်ဘာ ၃ ရက်၊ ကျိုင်းတုံ

‎ရှမ်းအရှေ့ ကျိုင်းတုံမြို့နယ်မှာ ကားတစ်စီး မှောက်ရာကနေ ခရီးသည် ၂ ဦး သေဆုံးပြီး ၇ ဦး ဒဏ်ရာ ရခဲ့ကြောင်း ဖြစ်စဉ်သိရှိသူ အမျိုးသားရဲ့ ပြောပြချက်အရ သိရပါတယ်။

‎မနေ့ နိုဝင်ဘာ ၂ ရက် ညနေ ၄ နာရီဝန်းကျင်မှာ ကျိုင်းတုံမြို့နယ် ကျိုင်းတုံ-တောင်ကြီးလမ်း စပယ်ရှယ်တောင်အဆင်းမှာ လိုက်ထရပ်စ်တစ်စီး အရှိန်မထိန်းနိုင်ဘဲ တိမ်းမှောက်ခဲ့တာပဲ ဖြစ်ပါတယ်။

‎ဖြစ်စဉ်သိရှိသူ အမျိုးသားက “ခရီးသွားတဲ့ကားလား၊ ဘုရားဖူးကားလား သေချာမသိရဘူး။ အမျိုးသားတွေဘဲ သေတာ” လို့ ပြောပါတယ်။

‎ဖြစ်စဉ်‌နေရာမှာ အမျိုးသားတစ်ဦး ပွဲချင်းပြီး သေဆုံးခဲ့ပြီးတော့ ကျန်တစ်ဦးက ‌ကျိုင်းတုံ ပြည်သူ့ဆေးရုံကြီးမှာ သေဆုံးခဲ့ပြီး ဒဏ်ရာရသူတွေကိုလည်း ကျိုင်းတုံ ပြည်သူ့ဆေးရုံကြီးမှာသာ ကုသနေကြောင်း သူက ဆက်ပြောပါတယ်။

‎၎င်းနေရာမှာ မကြာခဏ ခရီးသည်ကား၊ ကုန်ကားတွေ တိမ်းမှောက်နေတာကြောင့် ခရီးသွားကားတွေ ဂရုတစိုက် မောင်းကြဖို့လိုကြောင်း အထက်ပါ အမျိုးသားက ပြောပါတယ်။

‎ပြီးခဲ့တဲ့ ဧပြီလကလည်း ၎င်းနေရာမှာ ခရီးသည်တင်ကားတစ်စီး တိမ်းမှောက်ခဲ့လို့ ၇ ဦး သေဆုံးခဲ့ပြီး ၃ ဦး ဒဏ်ရာ ရခဲ့ဖူးပါတယ်။

‎အလားတူ မတ်လ ၂၀ ရက်ကလည်း ကားမှောက်လို့ ၁ ဦး သေဆုံးခဲ့ဖူးပါတယ်။

~ ~ ~

ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။

Shwe Phee Myay YouTube

Shwe Phee Myay Telegram