မိုင်းရူပ၊ နိုဝင်ဘာ ၉ ရက်၊ သပိတ်ကျင်း
တော်လှန်ရေးတပ်တွေ ထိန်းချုပ်ထားတဲ့ မန္တလေးတိုင်း သပိတ်ကျင်းနဲ့ စဉ့်ကူးမြို့နယ်ထဲ စစ်ကောင်စီတပ်က ၂ ရက်ဆက်တိုက် ဗုံးကြဲတိုက်ခိုက်ခဲ့ရာ အရပ်သား ထိခိုက်သေဆုံးမှု ရှိခဲ့တယ်လို့ မြေပြင်အခြေအနေ သိရှိသူတချို့က ရွှေဖီမြေကို ပြောပါတယ်။
မနေ့ နိုဝင်ဘာ ၈ ရက် မနက် ၁၁ နာရီဝန်းကျင်မှာ စစ်တပ်က သပိတ်ကျင်းမြို့နယ် ညောင်ပင်သာရွာကို ဂျက်လေယာဉ်နဲ့ ဗုံး ထပ်မံ ကြဲချတိုက်ခိုက်ခဲ့ရာ အမျိုးသမီးတစ်ဦး သေဆုံးခဲ့တယ်လို့ ဆိုပါတယ်။
“အမျိုးသမီးတစ်ယောက် ထိသွားတယ်။ လေကြောင်းကတော့ နှစ်ရက်ရှိပြီ လာကြဲတာ။ စဉ့်ကူး လိပ်ကျအောက်ဘက်တော့ နေ့တိုင်း ကြဲနေတာ။ ဒရုန်းနဲ့လည်း ဆက်တိုက် ကြဲနေတယ်” လို့ မြေပြင်သတင်းအရင်းအမြစ်တစ်ဦးက ပြောပါတယ်။
နိုဝင်ဘာ ၇ ရက် နေ့လယ်ပိုင်းမှာလည်း စဉ့်ကူးမြို့နယ် ရွှေပြည်၊ ညောင်ကုန်းနဲ့ ရွှေပန်းတောရွာကို ဗုံးပတ်ကြဲခဲ့ရာ သေဆုံးသူ ၃ ဦးနဲ့ ဒဏ်ရာရသူ ၁၀ ဦးထက်မနည်း ရှိခဲ့ပါတယ်။
စစ်တပ်ဟာ တော်လှန်ရေးတပ်တွေ ထိန်းချုပ်ထားတဲ့ စဉ့်ကူးမြို့နယ်အပါအဝင် သပိတ်ကျင်း၊ မတ္တရာမြို့နယ်ထဲ ထိုးစစ်ဆင်မှု ဆက်တိုက် လုပ်ဆောင်နေသလို လေယာဉ်နဲ့ ဗုံးကြဲတိုက်ခိုက်တာကိုလည်း ဆက်တိုက် ပြုလုပ်နေပါတယ်။
လက်ရှိမှာ စစ်တပ်ဟာ မတ္တရာမြို့နယ်ရှိ တော်လှန်ရေးတပ်တွေ ထိန်းချုပ်ထားတဲ့ နယ်မြေတွေကို ထိုးစစ်ဆင် တိုက်ခိုက်နေပြီး တိုက်ပွဲ နေ့စဉ်လိုလို ဖြစ်ပွားနေပါတယ်။
စစ်တပ်ဘက်ကတော့ စဉ့်ကူးနဲ့ သပိတ်ကျင်းမြို့နယ်ထဲ လေကြောင်း အသုံးပြုပြီး ဗုံးကြဲတိုက်ခိုက်နေတာနဲ့ ပတ်သက်ပြီး တစုံတရာ ထုတ်ပြန်ထားတာ မရှိသေးပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
