ပို့လဘား၊ ဒီဇင်ဘာ ၁၃ ရက်၊ ကမ္မမြို့
မကွေးတိုင်း ပခုက္ကူမြို့နယ် ကမ္မမြို့မှာ စစ်ကောင်စီတပ်က ပစ်ခတ်လိုက်တဲ့လက်နက်ကြီးကြောင့် အမျိုးသားတစ်ဦးသေဆုံးပြီး အမျိုးသမီးတစ်ဦး ဒဏ်ရာရရှိခဲ့တယ်လို့ ဒေသခံအမျိုးသားတစ်ဦးက ပြောပါတယ်။
ဒီနေ့ ဒီဇင်ဘာ ၁၃ ရက် နေ့လယ်ဝန်းကျင်မှာ မြိုင်မြို့နယ် ကန်သစ်ရွာကနေ ပခုက္ကူမြို့နယ် ကမ္မမြို့ဘက်ကို စစ်ကောင်စီတပ်က အင်အား တစ်ရာကျော်နဲ့ ရောက်ရှိလာပြီး ကမ္မရဲစခန်းကနေ စစ်ကောင်စီတပ်က လက်နက်ကြီး ပစ်ခတ်ခဲ့တာ ဖြစ်ပါတယ်။
“သူတို့ ကမ္မရဲစခန်းရောက်ပြီး လက်နက်ကြီးတွေပစ်ခတ်နေကြတာ။ လင်မယားနှစ်ယောက်က နေအိမ်ထဲမှာပဲ နေကြတာ။ နေအိမ်ပေါ်ပစ်လိုက်တဲ့သဘောမျိုးပါပဲ။ သူတို့လင်မယားနှစ်ယောက်ထိပြီး အမျိုးသမီးက ဒဏ်ရာပြင်းထန်တယ်။ နေအိမ်တွေကိုလည်း မီးရှို့သွားတာရှိတယ်။ အရေအတွက်ကိုတော့ မသိရသေးဘူး” လို့ ဆိုပါတယ်။
သေဆုံးသွားခဲ့တဲ့ အမျိုးသားနဲ့ ထိခိုက်ဒဏ်ရာရရှိခဲ့တဲ့ အမျိုးသမီးဟာ အသက် ၅၅ နှစ် ဝန်းကျင်သာ ရှိတဲ့ ဒေသခံတွေ ဖြစ်တယ်လို့ ပြောပါတယ်။
အဆိုပါ စစ်ကောင်စီတပ်ရဲ့ စစ်ကြောင်းဟာ ပခုက္ကူတပ်မ (၁၀၁)ကနေ ထွက်ခွာလာပြီးနောက် ပခုက္ကူမြို့နယ်တစ်လျှောက်ကို စစ်ကြောင်းထိုးလာနေပြီး ဒေသခံတွေကိုလည်း ဖမ်းဆီးခေါ်ဆောင်သွားတာရှိသလို သတ်ဖြတ်ခဲ့တာတွေကိုလည်း ရှိခဲ့ပါတယ်။
ပြီးခဲ့တဲ့ ဒီဇင်ဘာ ၈ ရက်ကလည်း မြိုင်အရှေ့ဘက်ခြမ်းရှိ ၄ နှစ်နီးပါးကြာ စစ်ရှောင်နေတဲ့ ကင်းရွာခံရဲ့ ကောက်သီးပဲနှံ သိမ်းဆည်းထားတဲ့ ယာတော ၈ လုံးကိုလည်း စစ်ကောင်စီတပ်က မီးရှို့ဖျက်ဆီးခဲ့တာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
