မိုင်းပန်ပျော်၊ ဖေဖော်ဝါရီ ၂၂ ရက်၊ နမ့်ခမ်း
တအာင်းတပ်မတော်- TNLA ထိန်းချုပ်ထားတဲ့ ရှမ်းမြောက် နမ့်ခမ်းမြို့ ဝိန်းဆာရပ်ကွက်မှာ အုတ်တံတိုင်း ပြိုကျတာကြောင့် မန်ဂူသီး ခူးနေတဲ့ ကလေးငယ်နှစ်ဦးကို ပိမိရာကနေ တစ်ဦးသေဆုံးပြီး တစ်ဦးက ဒဏ်ရာ ရခဲ့ပါတယ်။
မနေ့ ဖေဖော်ဝါရီ ၂၁ ရက် မနက် ၉ နာရီခန့်မှာ ယောက်ျားလေးနှစ်ဦးက မန်ဂူသီး ခူးစားဖို့ အုတ်တံတိုင်းပေါ် တက်ရာကနေ အုတ်တံတိုင်း ပြိုတာကြောင့် ထိခိုက်သေဆုံးခဲ့ကြတာလို့ မြို့ခံအမျိုးသမီးတစ်ဦးက ပြောပါတယ်။
“သူတို့က ကျောင်းတက်နေရင်းနဲ့ သူတို့ သူငယ်ချင်း ၃ ယောက်က မန်ဂူသီး ခူးစားမလို့ အုတ်တံတိုင်းပေါ် တက်တာ။ အဲဒီအုတ်တံတိုင်းက ဟောင်းနေပြီ။ အုတ်တံတိုင်း မခံဘူးပေါ့။ ပြောရမယ်ဆိုရင် သူက အဲဒီအုတ်တံတိုင်းပေါ် တက်ပြီး အဲဒီအသီး ခူးဖို့ပေါ့။ အုတ်တံတိုင်းက ပြိုကျတာ။ သူ့ကိုဖိပြီး သေသွားတာ။ တစ်ယောက်ကျတော့ ခြေထောက် ဖိပြီး ဒဏ်ရာ ရသွားတယ်။ နောက်တစ်ယောက်က ဘာမှမဖြစ်ဘူး”
အုတ်တံတိုင်း ပြိုပိရာကနေ ဦးခေါင်းနဲ့ ရင်ဘတ် ထိပြီး သေဆုံးသွားတဲ့ ကလေးငယ်ဟာ ၁၂ နှစ်အရွယ်သာ ရှိသေးတဲ့ မောင်ကျောက်လောက်ဆိုသူဖြစ်ပြီး ထိခိုက်ဒဏ်ရာ ရသူကတော့ ၇ နှစ်အရွယ် မောင်တင်ဝင်းဆိုသူပဲ ဖြစ်ပါတယ်။
သူတို့တွေဟာ နမ်ခမ်းမြို့ ဝိန်းဆာရပ်ကွက်မှာ နေထိုင်ကြတဲ့ တရုတ်လူမျိုး ဖြစ်တယ်လို့လည်း သိရပါတယ်။
