အိုက်ပွီး၊ ဇန်နဝါရီ ၆ ရက်၊ ချင်းပြည်
ချင်းပြည်နယ်မြောက်ပိုင်း၊ ဖလမ်းမြို့နယ်နဲ့ တီးတိန်မြို့နယ်မှာ ဇန်နဝါရီလ ၄ ရက်နဲ့ ၅ ရက်နေ့ နှစ်ရက်တာ တိုက်ပွဲအတွင်းမှာ စစ်ကောင်စီ တပ်ဖွဲ့ဝင် ၁၂ ဦး အရှင်ဖမ်းဆီးရမိခဲ့တယ်လို့ ရှေ့တန်းစစ်ရေးသတင်းမြစ်ဆီက သိရပါတယ်။
စစ်ကောင်စီတပ်တွေ ပြန်လည်နေရာယူထားတဲ့ တီးတိန်မြို့နယ်၊ တီးတိန် – ကလေး ကားလမ်းမပေါ်ရှိ ကနေဒီတောင်စခန်းသိမ်းတိုက်ပွဲမှာ ဇန်နဝါရီလ ၄ ရက်က စစ်ကောင်စီတပ်ဖွဲ့ဝင် ၁၀ ဦးကို ချင်းတော်လှန်ရေးပူးပေါင်းအဖွဲ့တွေက ဖမ်းဆီးရမိခဲ့တာ ဖြစ်ပါတယ်။
“ကနေဒီတောင်ကို ပြီးခဲ့တဲ့လက တီးတိန်မြို့ကနေ စစ်ကောင်စီ အင်အားရာနဲ့ချီ စစ်ကြောင်း ထိုးပြီး နေရာပြန်ယူတယ်။ အဲတုန်းက တော်လှန်ရေးတပ်ဖွဲ့တွေဘက်က တပ်ဆုတ်ပေးသွားတယ်။ ဒီဇင်ဘာလ ၂၇ ရက်မှာ ပြန်တိုက်ပါတယ်။ ဇန်နဝါရီလ ၄ ရက်မှာ ကနေဒီတောင် ပြန်ရတယ်။ အဲတိုက်ပွဲမှာ စစ်ကောင်စီ ၁၀ ဦး အရှင်ဖမ်းမိတယ်။” လို့ ရှေ့တန်းစစ်ရေးသတင်းရစ်မြစ်က ရွှေဖီမြေသို့ ပြောပါတယ်။
အလားတူ ဖလမ်းမြို့သို့ စစ်ကြောင်းထိုးလာတဲ့ စစ်ကောင်စီတပ်ဖွဲ့နဲ့ ချင်းတော်လှန်ရေး ပူးပေါင်းတပ်ဖွဲ့တွေက မနေ့ ဇန်နဝါရီလ ၄ ရက်နေ့က ခွါလ်လီကျေးရွာမှာ တိုက်ပွဲဖြစ်ပွားပြီး စစ်ကောင်စီတပ်ဖွဲ့ ၂ ဦးအရှင် ဖမ်းဆီးရမိခဲ့တယ်လို့ သိရပါတယ်။
“မနေ့က တနေ့ကုန် တိုက်ပွဲပြင်းထန်တယ်။ ခွါလ်လီရွာမှာ ရောက်လာပြီး စခန်းထိုင်တဲ့ စစ်ကောင်စီ စခန်းကုန်း ၂ ခုကို သိမ်းပိုက်ရရှိထားပါတယ်။ အဲဒီတိုက်ပွဲမှာ စစ်ကောင်စီ ၂ ဦးကို အရှင်ဖမ်းမိထားပါတယ်။ လက်နက်ခဲယမ်းတွေလည်း သိမ်းဆည်းရမိတယ်။” လို့ ရှေ့တန်းစစ်ရေးသတင်းရစ်မြစ်က ရွှေဖီမြေသို့ ပြောပါတယ်။
တီးတိန်မြို့နယ်နဲ့ ဖလမ်းမြို့နယ် တိုက်ပွဲကို ချင်းညီနောင် (CB) နဲ့ ချင်းပြည်အစိုးရ (CC) တို့ ပူးပေါင်းတိုက်ခိုက်ခဲ့တာဖြစ်ပါတယ်။
ပြီးခဲ့တဲ့ ဇန်နဝါရီလ ၃ ရက်နေ့ကလည်း ဖလမ်းမြို့နယ်၊ ခွါလ်လီကျေးရွာ တိုက်ပွဲမှာ စစ်ကောင်စီတပ်ဖွဲ့ဝင် ၅ ဦးသေဆုံးပြီး ၂ ဦးအရှင်ဖမ်းဆီးရမိကာ လက်နက်ခဲယမ်းအများပြားကိုလည်း ချင်းတော်လှန်ရေးပူးပေါင်းအဖွဲ့တွေက သိမ်းဆည်းရမိခဲ့ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
