ရွှေဖီမြေ၊ ဇန်နဝါရီ ၂၇ ရက်၊ တောင်ကုတ်
ရက္ခိုင်ပြည် တောင်ကုတ်၊ ဧရာဝတီတိုင်းနဲ့ မကွေးတိုင်းအစပ်မှာ အာရက္ခတပ်တော်- AA နဲ့ စစ်တပ်တို့ တိုက်ပွဲ ဆက်ဖြစ်နေပြီး စစ်စခန်းတွေကို AA ဘက်က သိမ်းပိုက်ရရှိခဲ့ပါတယ်။
တောင်ကုတ်မြို့နယ်ထဲက ရက္ခိုင်ရိုးမတောင်တန်းထက်ရှိ မိုးထိတောင် စစ်စခန်းကို ဇန်နဝါရီ ၂၁ ရက်က စတင်ထိုးစစ်ဆင်တိုက်ခိုက်ရာ ငါးရက်ခန့် အပြင်းအထန် ထိုးစစ်ဆင် တိုက်ခိုက်ပြီးနောက် ဇန်နဝါရီ ၂၆ ရက်မှာ အပြီးသတ် သိမ်းပိုက်နိုင်ခဲ့ပြီး စစ်အသုံးအဆောင်၊ လက်နက်ခဲယမ်း၊ အလောင်းတချို့ကို သိမ်းဆည်းရမိခဲ့တယ်လို့ ဆိုပါတယ်။
ဒါ့အပြင် ဧရာဝတီ-ရက္ခိုင်အစပ် ဧရာဝတီတိုင်းအတွင်း AA သိမ်းပိုက်ထားတဲ့ ပွိုင့် ၂၆၃ စခန်းကို စစ်တပ်က ဒီနေ့လယ် ၁ နာရီခွဲကျော်က လေကြောင်း၊ လက်နက်ကြီး ပစ်ကူနဲ့အတူ ထိုးစစ်ဆင် တိုက်ခိုက်တာကြောင့် တိုက်ပွဲ ပြင်းထန်ခဲ့ပါတယ်။
ပွိုင့် ၂၆၃ စခန်းကို မနေ့ ဇန်နဝါရီ ၂၆ ရက် နေ့လယ် ၂ နာရီကျော်က အပြီးသတ် သိမ်းပိုက်ရရှိခဲ့ပြီး ဇန်နဝါရီ ၂၁ ရက်က ပွိုင့် ၃၆၉ စခန်းကို သိမ်းပိုက်ရရှိခဲ့ကြောင်း ဖော်ပြထားပါတယ်။
မကွေးတိုင်း ငဖဲမြို့နယ် ဂုတ်စီးရိုးရွာအနီး (အမ်း-ပဒါန်း ကားလမ်းမထက်) ဒီနေ့မှာ စစ်ကောင်စီ ခမရ ၄၁၉၊ ၁၄ ပူးပေါင်းစစ်ကြောင်းနဲ့ AA တို့ နာရီဝက်ခန့် တိုက်ပွဲ ဖြစ်ပွားခဲ့ရာ စစ်တပ်က ဂုတ်စီးရိုးရွာဘက် ဆုတ်ခွာခဲ့တာကြောင့် AA တပ်ဖွဲ့ လိုက်လံရှင်းလင်းတိုက်ခိုက်ရာ စစ်သားအလောင်းနဲ့ လက်နက်ခဲယမ်းတချို့ကို ထပ်မံ သိမ်းဆည်းရမိခဲ့ပါတယ်။
စစ်တွေမြို့အနီးပတ်ဝန်းကျင်မှာ နှစ်ဖက် အပြန်အလှန် လက်နက်ကြီး၊ စနိုက်ပါ၊ ဒရုန်းပစ်ခတ်တိုက်ခိုက်မှုလည်း နေ့တိုင်း ရှိနေကြောင်း ဆက်လက် ဖော်ပြထားပါတယ်။
