မိုင်းရူပ၊ မေလ ၂၂ ရက်
တအာင်းတပ်မတော် PSLF/TNLA ထိန်းချုပ်နယ်မြေမှာ ကားလိုင်စင်တွေ ပြုလုပ်ပေးမှာဖြစ်ပြီး ၂ သိန်းကျပ်ကနေ ၅ သိန်းကျပ်အထိ ဝန်ဆောင်ခပေးရမယ်လို့ တအာင်းတပ်က ဒီနေ့ မေလ ၂၂ ရက်မှာ ထုတ်ပြန်လာပါတယ်။
ကားလိုင်စင်တွေကို လာမယ့် မေလ ၂၅ ရက်ကနေ ဒီဇင်ဘာ ၃၁ ရက်အထိ PSLF/TNLA ရဲ့ မော်တော်ယာဥ် မှတ်ပုံတင်ကြီးကြပ်ရေးဌာနက ပြုလုပ်ပေးမှာ ဖြစ်ပါတယ်။
နမ့်ခမ်းနဲ့ နမ့်ဆန်မြို့နယ်တွေမှာ အရင်ဆုံး ပြုလုပ်ပေးမှာဖြစ်ပြီး ကျန်မြို့နယ်တွေမှာလည်း ဆက်လက်လုပ်ဆောင်သွားမှာဖြစ်သလို လိုင်စင်ပြုလုပ်တဲ့ စီမံချက်ကာလ ပြီးဆုံးရင် ကားလိုင်စင်မရှိတဲ့သူတွေကို အရေးယူမှုတွေ ပြုလုပ်သွားမယ်လို့ ဖော်ပြထားပါတယ်။
ကားလိုင်စင်တွေကို TNLA ထိန်းချုပ်ဒေသမှာ ဖြတ်သန်းသွားလာတဲ့ ကားတွေအားလုံး ပြုလုပ်ရမှာဖြစ်ပြီး လိုင်စင်သက်တမ်း ၂ နှစ် သတ်မှတ်ထားတယ်လို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးက ရွှေဖီမြေကို ပြောပါတယ်။
“တအာင်းဒေသမှာ ဖြတ်သန်းသွားလာတဲ့ ယာဉ်များ မှတ်ပုံတင် လိုင်စင်ပြုလုပ်ရမယ်။ လိုင်စင်သက်တမ်းက ၂ နှစ်ပါ” လို့ ဆိုပါတယ်။
ကားလိုင်စင် ပြုလုပ်ရတာဟာ မော်တော်ယာဉ်နဲ့ ပတ်သက်တဲ့ ပိုင်ဆိုင်မှု၊ ရောင်းဝယ်မှု၊ ယာဉ်တိုက်မှု၊ ယာဉ်ပျောက်ဆုံးမှု အစရှိတဲ့ ပြဿနာတွေ လျော့ကျစေမှာဖြစ်ပြီး မော်တော်ယာဥ်တွေ စနစ်ကျအသုံးပြုနိုင်ဖို့အတွက်လည်း ဖြစ်တယ်လို့ TNLA က ဆိုပါတယ်။
PSLF/TNLA ဟာ လက်ရှိမှာ ရှမ်းမြောက် နမ့်ဆန်၊ မန်တုံ၊ နမ္မတူ၊ ကျောက်မဲ၊ ကွတ်ခိုင်၊ နမ့်ခမ်း၊ သီပေါ၊ နောင်ချို၊ မိုးမိတ်၊ မိုင်းလုံ၊ မိုင်းငေါ့နဲ့ မန္တလေးတိုင်း မိုးကုတ်မြို့တွေကို ထိန်းချုပ်ထားပြီး ၎င်းတို့ရဲ့ အုပ်ချုပ်ရေးယန္တရားလည်း လည်ပတ်နေပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
