ရွှေဖီမြေ၊ ဧပြီ ၂၅ ရက်၊ နမ့်ဆန်
တအာင်းဒေသ နမ့်ဆန်မြို့နယ် မြို့သစ်ကျေးရွာမှာ အုပ်စုဖွဲ့ ဆိုင်ကယ် လိုက်ခိုးနေတဲ့ အမျိုးသား ၅ ဦးကို ခိုးယူထားတဲ့ ဆိုင်ကယ် ၇ စီးနဲ့အတူ ဖမ်းမိခဲ့ကြောင်း တအာင်းတပ်- TNLA က ဒီနေ့ ဧပြီ ၂၅ ရက်မှာ ထုတ်ပြန်လာပါတယ်။
ပြီးခဲ့တဲ့ ၂ဝ၂၄ ခုနှစ် ဒီဇင်ဘာလကစပြီး မြို့သစ်ရွာအနီးက ဒေသခံရဲ့ ဆိုင်ကယ်တွေကို လိုက်ခိုးနေပြီး ဈေးနှုန်း ချိုချိုသာသာနဲ့ ပြန်ရောင်းနေတာ ရှိတယ်လို့ ဒေသခံတွေက လာရောက် တိုင်ကြားတာကြောင့် မြို့နယ်ရဲတပ်ဖွဲ့က ဒေသခံနဲ့ ပူးပေါင်းပြီး ဧပြီ ၃ ရက်မှာ ဆိုင်ကယ်သူခိုး ၅ ဦးနဲ့အတူ ဆိုင်ကယ် ၇ စီးလည်း ဖမ်းဆီးမိခဲ့တယ်လို့ ဆိုပါတယ်။
အဲဒီအမျိုးသား ၅ ဦးဟာ အသက် ၂၄ နှစ်အရွယ် မိုင်းအမောင်၊ ၁၄ နှစ်အရွယ် မိုင်းကျော်သူ၊ ၁၆ နှစ်အရွယ် မိုင်းနေထက်လင်း၊ ၂ဝ အရွယ် မိုင်းမျိုးအောင်နဲ့ ၂၂ နှစ်အရွယ် မိုင်းချမ်းထိုက်စံတို့ ဖြစ်တယ်လို့ ထုတ်ပြန်ချက်မှာ ဖော်ပြထားပါတယ်။
ခိုးယူထားတဲ့ ဆိုင်ကယ်တွေကို ပိုင်ရှင်ထံ ပြန်လည် ပေးအပ်ခဲ့ပြီး ခိုးမှု ကျူးလွန်ထားတဲ့ အမျိုးသား ၅ ဦးကိုတော့ တရားဥပဒေနဲ့အညီ ထိထိရောက်ရောက် အရေးယူသွားမယ်လို့ ထုတ်ပြန်ထားပါတယ်။
နမ့်ဆန်မှာ ၁၀၂၇ စစ်ဆင်ရေး မစတင်ခင်ကတည်းက အုပ်စုလိုက်ဖွဲ့ပြီး ဆိုင်ကယ် ခိုးယူတာတွေ ရှိခဲ့ရာကနေ TNLA ထိန်းချုပ်ပြီးနောက် လျော့ကျလာပေမဲ့ အခု အုပ်စုလိုက် ဆိုင်ကယ် ခိုးယူနေတဲ့ဖြစ်စဉ် ထပ်မံ ဖြစ်ပွားလာတာပဲ ဖြစ်ပါတယ်။
