ရွှေဖီမြေ၊ ဇူလိုင် ၃၀ ရက်
စစ်ကောင်စီတပ်ဟာ စစ်နဲ့မဆိုင်တဲ့ လူနေအိမ်၊ စာသင်ကျောင်း၊ ဘာသာရေးအဆောက်အအုံတွေနဲ့ ဟိုတယ်၊ တည်းခိုခန်းတွေကို လေကြောင်းကနေ ရည်ရွယ်ချက်ရှိရှိ တိုက်ခိုက်နေလျက်ရှိနေတယ်လို့ တအာင်းတပ်က ထုတ်ပြန်ပါတယ်။
တအာင်းအမျိုးသားလွှတ်မြောက်ရေးတပ်မတော် – PSLF/TNLA က ဒီလိုစစ်ရာဇဝတ်မှုတွေကို ပေါ်ပေါ်ထင်ထင် ပြုလုပ်နေတဲ့စစ်ကောင်စီရဲ့ လုပ်ရပ်ကို ရှုံ့ချကြောင်း ဒီနေ့ ဇူလိုင် ၃၀ ရက် ရက်စွဲနဲ့ ထုတ်ပြန်ခဲ့ပါတယ်။
အရပ်သားပြည်သူတွေအပေါ် စစ်ကောင်စီတပ်ရဲ့ ကျူးလွန်မှုတွေ ရပ်တန့်စေဖို့ ကုလသမဂ္ဂ၊ နိုင်ငံတကာနဲ့ တရုတ်ပြည်သူ့သမ္မတနိုင်ငံတို့ကို အကူအညီတောင်းခံကြောင်းလည်း ထုတ်ပြန်ချက်မှာ ဆိုထားပါတယ်။
စစ်ကောင်စီတပ်ဟာ မြန်မာပြည်သူလူထုတို့ရဲ့ ဆန့်ကျင်တော်လှန်မှုတွေကို အလူးအလဲခံနေရတာကြောင့် ပြည်သူတွေကို ရန်သူသဖွယ် ရက်ရက်စက်စက်ချေမှုန်းလျက်ရှိနေတယ်လို့ ဆိုပါတယ်။
မြန်မာစစ်အာဏာရှင် ကျဆုံးလုနီးပါးဖြစ်နေတဲ့အခြေအနေကို အခွင့်ကောင်းရယူပြီး အရင်ကထက် မဟာဗျူဟာမြောက်တဲ့ တော်လှန်ရေးအစီအမံတွေနဲ့ စုပေါင်းပြီး ဟန်ချက်ညီညီ ဝိုင်းဝန်းတော်လှန်တိုက်ခိုက်ကြရန် တော်လှန်ရေးအင်အားစုတွေနဲ့ တိုင်းရင်းသားလက်နက်ကိုင်တွေကိုလည်း တိုက်တွန်းထားပါတယ်။
TNLA ထိန်းချုပ်ထားတဲ့မြို့တွေပေါ်မှာရှိတဲ့ လူနေအိမ်၊ စာသင်ကျောင်း၊ ဟိုတယ် စတဲ့နေရာတွေကို စစ်ကောင်စီတပ်ကရဲ့ လေကြောင်းတိုက်လိုက်မှုကြောင့် တစ်လကျော်အတွင်း ကလေးနဲ့ အမျိုးသမီးတွေအပါအဝင် ဒေသခံလူထု ၃၂ ဦးထက်မနည်း သေဆုံးသွားခဲ့ပြီး ၈၀ ကျော်ဒဏ်ရာရရှိခဲ့ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
