ရွှေဖီမြေ၊ ဧပြီ ၁၂ ရက်
တအာင်းတပ်- TNLA ထိန်းချုပ်ထားတဲ့ ရှမ်းမြောက်က မြို့နယ်အပြင် မန္တလေးတိုင်း မိုးကုတ်မြို့နယ်မှာ ငလျင်ဘေးသင့် လူထုတွေအတွက် အလှူခံခဲ့ရာ သိန်း ၄ ထောင်ကျော် ရရှိခဲ့ကြောင်း PSLF/TNLA ရဲ့ သတင်းနဲ့ပြန်ကြားရေးဌာနမှာ ဖော်ပြထားပါတယ်။
တအာင်းဒေသ မန်တုံ၊ နမ့်ဆန်နဲ့ ရှမ်းမြောက် နမ္မတူ၊ ကွတ်ခိုင်၊ နမ့်ခမ်း၊ ကျောက်မဲ၊ မန္တလေးတိုင်း မိုးကုတ်မြို့နယ် စတဲ့နေရာတွေမှာ ကော်မတီ ဖွဲ့ပြီး အလှူခံခဲ့တာပဲ ဖြစ်ပါတယ်။
နမ့်ဆန်မြို့နယ်မှ သိန်း ၉၀၀ ကျော်၊ မန်တုံမြို့နယ်မှ သိန်း ၂၀၀ ကျော်၊ နမ့်ခမ်းမြို့နယ်မှ သိန်း ၁ ထောင်ကျော်၊ နမ္မတူမြို့နယ်မှ သိန်း ၄၀၀ ကျော်၊ ကွတ်ခိုင်မြို့နယ်မှ သိန်း ၄၀၀ ကျော် ၊ ကျောက်မဲမြို့နယ်မှ သိန်း ၂၀၀ ကျော်နဲ့ မိုးကုတ်မြို့နယ်မှ သိန်း ၁ ထောင် ကောက်ခံရရှိခဲ့တာပဲ ဖြစ်ပါတယ်။
အလှူငွေတွေကို တအာင်းအရပ်ဖက် အဖွဲ့အစည်း- TCSOs နဲ့ မြို့နယ်အလိုက် တက်ကြွလူငယ် လူမျိုးပေါင်းစုံ ပူးပေါင်းပြီး ကောက်ခံခဲ့တာပဲ ဖြစ်ပါတယ်။
ရရှိတဲ့ ငွေတွေကို ပထမဦးစားပေးအနေနဲ့ အင်းလေး၊ စစ်ကိုင်း၊ မင်းကွန်း၊ ပုလိပ် စတဲ့နေရာမှာ ကူညီပေးသွားမှာဖြစ်ပြီး ဒုတိယ ဦးစားပေးအနေနဲ့ ရှမ်းတောင် ကလောမြို့နယ် တောင်နီ၊ ပိန္နဲပင်၊ စေတီကုန်း စတဲ့နေရာတွေမှာ ကူညီပေးသွားမှာ ဖြစ်တယ်လို့ ဆိုပါတယ်။
