မိုင်းဖိူမ်းဆငဲ၊ ဒီဇင်ဘာ ၁၂ ရက်၊ မိုးကုတ်
စစ်ကောင်စီတပ် ပြန်လည်ထိန်းချုပ်တဲ့ မိုးကုတ်မြို့နယ်ထဲက ပိန်းပြစ်ရွာခံ လီဆူလူမျိုး ၃ ဦးကို ဂိတ်စောင့်တဲ့ စစ်ကောင်စီတပ်သားတွေက ဖမ်းဆီးထားခဲ့တယ်လို့ မိသားစုဝင်နဲ့ နီးစပ်သူတစ်ဦးက ရွှေဖီမြေကို ပြောပါတယ်။
ဖြစ်စဥ်က ပြီးခဲ့တဲ့ ဒီဇင်ဘာ ၂ ရက်မှာ မိုးကုတ်မြို့ထဲ ဈေးသွားဝယ်တဲ့ ဦးသိန်းလေး (၅၃ နှစ်)၊ ဦးဆီမီး (၄၅ နှစ်)၊ မောင်ဇီဆီး (၂၂ နှစ်) တို့ ပိန်းပြစ်ကျေးရွာကို ပြန်လာတဲ့အချိန်မှာ ဖမ်းဆီးခံခဲ့ရတာ ဖြစ်ပါတယ်။
မိသားစုဝင်နဲ့ နီးစပ်သူတစ်ဦးက “မိုးကုတ်မှာ အမျိုးတွေဖမ်းခံရလို့။ တပ်မတော်က ဖမ်းထားတာ။ အကျိုးအကြောင်းလည်း ဘာမှမသိရဘူး။ ဘယ်နားပို့ထားလဲ၊ အသက်ရှင်သေးလား မသိရဘူး။ ရိုးသားတဲ့ လီဆူတွေ ဖြစ်ကြပါတယ်” လို့ ဆိုပါတယ်။
ဖမ်းဆီးခံရတဲ့ သူတွေဟာ အဖွဲ့အစည်းတွေနဲ့ ပက်သက်ဖူးသူ မဟုတ်သလို နိုင်ငံရေးလှုပ်ရှားသူတွေမဟုတ်ဘဲ သာမာန်လက်လုပ်လက်စား ရွာခံဖြစ်တယ်လို့ သူက ဆက်ပြီး ပြောပါတယ်။
အဲဒီရွာခံ ၃ ဦးတို့ ဖမ်းဆီးခံရတာနဲ့ ပက်သက်ပြီး စစ်ကောင်စီတပ်ထံ ရပ်ရွာလူကြီးတွေက သွားရောက်အကူအညီ တောင်းခံတာရှိပေမဲ့ အတွေ့မခံတဲ့အပြင် ဆဲဆိုကျိန်မောင်းပြီး ပြန်ခိုင်းခဲ့တယ်လို့ သိရပါတယ်။
မိုးကုတ်မြို့ကို တရုတ်ကြားဝင်စေ့စပ်ပေးမှုနဲ့ တအာင်းတပ် – TNLA ထံ ပြန်ရယူပြီး ပြီးခဲ့တဲ့ နိုဝင်ဘာ ၂၉ ရက်မှာ မြို့ထဲကို စတင်ဝင်ရောက်လာခဲ့တာ ဖြစ်ပါတယ်။
မြို့ထဲ ဝင်ရောက်လာပြီးနောက် ၃ ရက်အကြာ ဒီဇင်ဘာ ၂ ရက်မှာပဲ ဒေသခံ ၃ ဦးကို မသင်္ကာမှုနဲ့ စတင်ဖမ်းဆီးလာတာ ဖြစ်ပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
