ရဲမာန်၊ အောက်တိုဘာ ၂၆ ရက်၊ ပခုက္ကူ
မကွေးတိုင်း ပခုက္ကူမြို့နယ် ညောင်ဂျစ်ပင် ပျူရွာရှိ စစ်ကောင်စီတပ်ဖွဲ့က ပစ်ခတ်လိုက်တဲ့ လက်နက်ကြီးကြောင့် အရပ်သား ၃ ဦး ထိမှန်ဒဏ်ရာရရှိခဲ့တယ်လို့ အညာမြေတပ်ပေါင်းစု သတင်းနဲ့ ပြန်ကြားရေးတာဝန်ခံ ကိုဘိုဘိုသန့်ဇင်က ရွှေဇီမြေကိုပြောပါတယ်။
ဒီနေ့ အောက်တိုဘာ ၂၆ ရက် နေ့လယ် ၁၂ နာရီမှာ စစ်ကောင်စီတပ်ဖွဲ့က ၆၀ မမ လက်နက်ကြီး ရမ်းသမ်းပစ်ခတ်မှုကြောင့် အမျိုးသမီး ၂ ဦးနဲ့ အမျိုးသားတစ်ဦးတို့ ထိမှန်ဒဏ်ရာရရှိခဲ့တယ်လို့ ၎င်းက ဆိုပါတယ်။
“၆၀ မမနဲ့ ပစ်လိုက်တာက ပခုက္ကူမြို့နယ် ပြည့်အိုင်ရွာကို ကျရောက်ပေါက်ကွဲခဲ့ပါတယ်။ အသက် ၄၅ နှစ်အရွယ် အမျိုးသမီးတစ်ဦးနဲ့ အသက် ၂၃ နှစ်အရွယ် အမျိုးသမီးတစ်ဦးတို့ ထိခိုက်ပြင်းထန်ဒဏ်ရာရရှိပြီး အသက် ၅၃ နှစ်အရွယ်အမျိုးသားကတော့ မစိုးရိမ်ရတဲ့ ဒဏ်ရာရရှိခဲ့ပါတယ်”
ပြီးခဲ့တဲ့ အောက်တိုဘာ ၂၄ ရက် ညနေပိုင်းမှာ စစ်ကောင်စီတပ်က ပခုက္ကူမြို့နယ် ထန်းတပင်ရွာကို စက်တပ်လေထီးနဲ့ ဗုံးကြဲတိုက်ခိုက်ခဲ့တာကြောင့် အရပ်သား ၂ ဦးသေဆုံးပြီး ၁ ဦးဒဏ်ရာရရှိခဲ့ပါတယ်။
ပြီးခဲ့တဲ့ အောက်တိုဘာ ၂၂ ရက်နေ့မှာ ပခုက္ကူတပ်မ ၁၀၁ စစ်ကြောင်းက ညောင်ဂျစ်ပင် ပျူရွာဘက်ကို စစ်ကြောင်းထိုးလာတာကြောင့် အရပ်သား ၆၀၀ ကနေ ၈၀၀ ကြား ထွက်ပြေးတိမ်းရှောင်နေရတယ်လို့ ၎င်းက ဆက်ပြောပါတယ်။
အဆိုပါစစ်ကြောင်းထိုးလာတာကြောင့် ပခုက္ကူမြို့နယ်ရှိ ရေလာကြီး၊ထန်းတပင်၊ ဖောင်ကျောင်း၊ဖောင်းကွဲ၊ ရေမျက်၊ပြည့်အိုင်၊ ရွာသာအေး ၊မြေပန်းတောင်း၊ စတဲ့ ကျေးရွာတွေဟာ ဘေးလွတ်ရာကို တိမ်းရှောင်နေကြရတယ်လို့ သိရပါတယ်။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှု နားဆင်နိုင်ပါတယ်။
