မိုင်းရူပ၊ နိုဝင်ဘာ ၃၀ ရက်၊ မိုးကုတ်
တရုတ်ရဲ့ကြားဝင်မှုနဲ့ မနေ့ နိုဝင်ဘာ ၂၉ ရက် ညပိုင်းမှာ အင်အား ၁ ထောင်ကျော်ရှိတဲ့ စစ်ကောင်စီတပ်ဟာ တအာင်းတပ်မတော်- PSLF/TNLA ထိန်းချုပ်ထားတဲ့ မိုးကုတ်မြို့ထဲ ဝင်ရောက်လာပါတယ်။
စစ်တပ်ဟာ နောင်ချို-မိုးကုတ်လမ်းပိုင်းကနေတဆင့် မိုးကုတ်မြို့ထဲ ဝင်ရောက်လာတာဖြစ်ပြီး စစ်ကား ၁၀၀ ဝန်းကျင် ရှိနိုင်တယ်လို့ မြေပြင်အခြေအနေ သိရှိသူတစ်ဦးက ရွှေဖီမြေကို ပြောပါတယ်။
“ကားအစီးတစ်ရာဆို ပစ္စည်းတင်တဲ့ကားက ၂၀ ပေါ့။ အခုလက်ရှိ ခန့်မှန်းအင်အား မိုးကုတ်မြို့ထဲမှာ ၁၆၀၀ လောက် ရှိနိုင်တယ်။ လက်ရှိ မိုးကုတ်မြို့တွင်းမှာ အင်အား ဖြန့်ထားတယ်”
ဒီနေ့ နိုဝင်ဘာ ၃၀ ရက်နဲ့ မနက်ဖြန် ဒီဇင်ဘာ ၁ ရက်အထိ စစ်ကောင်စီတပ်ဖွဲ့ဝင် ထပ်မံ ဝင်ရောက်လာဖို့ ရှိနေပြီး မိုးကုတ်ကနေတဆင့် မိုးမိတ်မြို့ထဲ ဆက်လက် ဝင်ရောက်လာမယ်လို့ ၎င်းက ဆက်ပြောပါတယ်။
စစ်ကောင်စီ ဝင်လာတဲ့ လမ်းကြောင်းတစ်လျှောက် TNLA တပ်ဖွဲ့ဝင်တွေ နေရာယူပြီး မြို့အဝင်အထွက်ကို ပိတ်ထားဆဲဖြစ်ကာ မိုးကုတ်မြို့ထဲ တအာင်းတပ်ရဲ့ အုပ်ချုပ်ရေးအဖွဲ့နဲ့ ရဲတပ်ဖွဲ့ဝင် ဆက်ရှိနေတယ်လို့ သိရပါတယ်။
မိုးကုတ်မြို့ခံ ၉၀ ရာခိုင်နှုန်းကျော်ကတော့ ဘေးလွတ်ရာကို ထွက်ပြေးတိမ်းရှောင်နေကြပြီး တအာင်းတပ်ဘက်က မိုးကုတ်မြို့တွင်းကနေ ဆုတ်ခွာရင် တိုက်ပွဲ ဖြစ်လာနိုင်တယ်လို့ သုံးသပ်မှုတွေ ရှိနေပါတယ်။
တရုတ်နိုင်ငံရဲ့ကြားဝင်မှုကြောင့် စစ်ကောင်စီတပ်နဲ့ တအာင်းတပ်တို့ ပြီးခဲ့တဲ့ အောက်တိုဘာ ၂၉ ရက်ကစကာ အပစ်ရပ်ဖို့ သဘောတူခဲ့ပြီး တအာင်းတပ်က မိုးကုတ်နဲ့ မိုးမိတ်မြို့နယ်ကို စစ်ကောင်စီထံ ပြန်လည် လွှဲပြောင်းပေးဖို့ သဘောတူခဲ့ပါတယ်။
လက်ရှိ မြို့အလွှဲအပြောင်းနဲ့ ပတ်သက်ပြီး စစ်ကောင်စီနဲ့ တအာင်းတပ်ဘက်ကတော့ တစုံတရာ သတင်းထုတ်ပြန်ထားတာ မရှိသေးပါဘူး။
~ ~ ~
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
