မိုင်းရူပ၊ ဇူလိုင် ၂၆ ရက်၊ ဒီးမော့ဆို
ကရင်နီတော်လှန်ရေးတပ်တွေ ထိန်းချုပ်ထားတဲ့ ကရင်နီပြည် ဒီးမော့ဆိုမြို့နယ်ထဲက နန်းမယ်ခုံမြို့အနီးမှာ စစ်ကောင်စီစစ်ကြောင်းတွေ ရောက်ရှိလာတာကြောင့် ထောင်နဲ့ချီတဲ့ ဒေသခံတွေ ထွက်ပြေးတိမ်းရှောင်နေရတယ်လို့ စစ်ဘေးရှောင်တွေကို ကူညီပေးနေသူတွေဆီက သိရပါတယ်။
စစ်ကောင်စီတပ်ဟာ မိုးဗြဲမြို့ကို ပြန်ထိန်းချုပ်ပြီးနောက် မိုးဗြဲ – လွိုင်ကော်လမ်းကနေ နန်းမယ်ခုံမြို့ဘက်ကို ထိုးစစ်ဆင်လာနေတာဖြစ်ပြီး နန်းမယ်ခုံမြို့တွင်းထဲ စစ်ကောင်စီတပ် ရောက်လာမှာကို စိုးရိမ်နေတာကြောင့် ဒေသခံတွေ ထွက်ပြေးတိမ်းရှောင်နေတာ ဖြစ်ပါတယ်။
“အခုစကစ စစ်ကြောင်းက နန်းမယ်ခုံတော့ မရောက်သေးဘူးပေါ့နော်။ အခု စစ်ကြောင်းက မြို့နဲ့ နီးလာတော့ လက်နက်ကြီးနဲ့ လျှောက်ထုမှာ ကြောက်လို့ ရွှေ့ပြောင်းတဲ့ သဘောပေါ့” လို့ စစ်ဘေးရှောင်တွေကို ကူညီပေးနေသူ အမျိုသမီးတစ်ဦးက ရွှေဖီမြေကို ပြောပါတယ်။
စစ်ဘေးရှောင်တွေကို ကူညီကယ်ဆယ်ရေးအဖွဲ့တွေက ဒီနေ့ ဇူလိုင်လ ၂၇ ရက်အထိ ကယ်ထုတ်နေဆဲဖြစ်ပြီး အများစုဟာ ဒီးမော့ဆိုအနောက်ခြမ်းနဲ့ နီးစပ်ရာဆွေးမျိုးတွေဆီမှာ တိမ်းရှောင်နေကြတယ်လို့ သူက ဆက်ပြောပါတယ်။
စစ်ကောင်စီတပ်ဟာ မိုးဗြဲမြို့ကို ပြန်ထိန်းချုပ်နိုင်ခဲ့ပြီးနောက် ဒီးမော့ဆိုမြို့နယ်ဘက်ကို စစ်ကြောင်းထိုးပြီး ထိုးစစ်ပြန်လုပ်ဖို့ ကြိုးစားနေတာဖြစ်ပြီး လက်ရှိအချိန်အထိ နန်းမယ်ခုံမြို့ကို ကရင်နီတော်လှန်ရေးတပ်တွေဘက် ထိန်းချုပ်ထားဆဲလို့ သိရပါတယ်။
ကရင်နီတော်လှန်ရေးတပ်တွေ ထိန်းချုပ်ခဲ့က မိုးဗြဲမြို့ကို စစ်ကောင်စီတပ်က ၈ လကျော်ကြာ ထိုးစစ်ဆင် တိုက်ခိုက်ခဲ့ပြီးနောက် ပြီးခဲ့တဲ့ ဇူလိုင် ၆ ရက်မှာ ပြန်ထိန်းချုပ်နိုင်ခဲ့တာ ဖြစ်ပါတယ်။
ရွှေဖီမြေ သတင်းတွေကို Facebook နဲ့ Website အပြင် အောက်ဖော်ပြပါ ချန်နယ်တွေမှာလည်း ဝင်ရောက် ဖတ်ရှုနားဆင်နိုင်ပါတယ်။
