မိုင်းပန်ပျော်၊ ဇန်နဝါရီ ၇ ရက်၊ တောင်ကြီး
ရှမ်းတောင် တောင်ကြီးမြို့မှာ စစ်ကောင်စီတပ်က ညပိုင်းမှာ အပြင်ထွက်သူတွေကို ပေါ်တာဆွဲပြီး စစ်သင်တန်းသို့ ပို့ဆောင်တာတွေ ဆက်လက် လုပ်ဆောင်နေပါတယ်။
တောင်ကြီးမြို့ပေါ်က လူအသွားအလာ များတဲ့နေရာတွေမှာ ပြီးခဲ့တဲ့ ၂၀၂၄ ခုနှစ် ဒီဇင်ဘာလကနေ လက်ရှိအချိန်ထိ စစ်ကောင်စီတပ်ဖွဲ့ဝင်က လိုက်လံ ဖမ်းဆီးနေတာလို့ တောင်ကြီးမြို့နေ အမျိုးသားတစ်ဦးက ရွှေဖီမြေသို့ ပြောပါတယ်။
“ပေါ်တာ ဆွဲတယ်ဆိုတာထက် မသင်္ကာလို့ ဖမ်းခေါ်စစ်ပြီးမှ စစ်မှုထမ်းသင်တန်း ပို့ကြတာ များတယ်။ စစ်မှုထမ်း ရောက်တဲ့သူတွေလည်း ထွက်ပြေးနေကြတာပဲ။ အဓိက က လူသွားလူလာများတဲ့နေရာတွေပေါ့။ တစ်နေရာတည်းလည်း မဟုတ်ဘူး။ ရှောင်တခင် လုပ်တာဆိုတော့ မထင်ရင် မထင်သလို လုပ်သွားတာပဲ”
ပြီးခဲ့တဲ့ ၂၀၂၄ ခုနှစ် ဒီဇင်ဘာလကနေ ၂၀၂၅ ခုနှစ် ဇန်နဝါရီ ၇ ရက်အထိ ဖမ်းဆီးခံရပြီး စစ်သင်တန်း ပို့ဆောင်ခံရသူ အယောက် ၂၀ ဝန်းကျင် ရှိပြီလို့လည်း အထက်ပါ အမျိုးသားက ပြောပါတယ်။
တောင်ကြီးမှာ ပြီးခဲ့တဲ့ ၂၀၂၄ ခုနှစ်ကတည်းက စစ်မှုထမ်းဖို့အတွက် မဲစာရင်းနှိုက်ခိုင်းပြီး မဲပေါက်လို့ စစ်မှုမထမ်းလိုတဲ့ လူငယ်တွေဆီကနေ ငွေ ယူကာ ယာယီလွတ်ငြိမ်းခွင့် ပေးထားတာတွေ ရှိခဲ့ပါတယ်။
