မိုင်းပန်ပျော်၊ ဇန်နဝါရီ ၉ ရက်၊ ဆီဆိုင်
ရှမ်းတောင် ဆီဆိုင်မြို့မှာ တိုက်ပွဲ ဖြစ်ပွားခြင်းမရှိဘဲ စစ်ကောင်စီတပ်က လက်နက်ကြီး ပစ်ခတ်တာကြောင့် ဒေသခံတွေက တိုက်ပွဲဖြစ်မှာကို စိုးရိမ်ပြီး ထွက်ပြေးတိမ်းရှောင်နေရတယ်လို့ ရွှေဖီမြေက စုံစမ်းသိရှိရပါတယ်။
ဆီဆိုင်မြို့အခြေစိုက် စစ်ကောင်စီရဲ့ ခြေမြန်တပ်ရင်း (ခမရ ၄၂၃)က ဒီနေ့ ဇန်နဝါရီ ၉ ရက် မနက် ၅ နာရီကနေ ၁၀ နာရီအထိ လက်နက်ကြီး ပစ်ခတ်ခဲ့တာလို့ ဆီဆိုင်ဒေသခံ အမျိုးသမီးတစ်ဦးက ရွှေဖီမြေကို ပြောပါတယ်။
“တိုက်ပွဲဖြစ်တာ မဟုတ်ဘူး။ ဒီအတိုင်းပဲ ပစ်တာ။ ဘယ်ဘက်ကို ထုတာလဲတော့ မသိဘူး။ မီးလုံး လှမ်းမြင်တာတော့ အနောက်တောင်တောင့်မှာ ပစ်တာ မြင်တယ်ရှင့်။ ကျမတို့ မရှောင်နိုင်တော့ဘူးလေ။ ဒုက္ခ တအား ရောက်တယ်။ အခုပြေးဖို့က လက်ထဲမှာ ပိုက်ဆံ တစ်ပြားမှ မရှိဘူး။ သူများတွေက ပိုက်ဆံ ရှိတဲ့လူတွေကတော့ ထွက်ပြေးကုန်ပြီ”
ဆီဆိုင်မြို့ပေါ်က ငွေကြေး တတ်နိုင်သူတွေကသာ အများဆုံး ထွက်ပြေးတိမ်းရှောင်ကြတာဖြစ်ပြီး ငွေ မတတ်နိုင်တဲ့ တချို့ကတော့ ထွက်ပြေးတိမ်းရှောင်ဖို့ အခက်အခဲ ရှိနေတယ်လို့ သူမက ဆက်ပြောပါတယ်။
နီးစပ်ရာ ဆွေမျိုးနဲ့ တောင်ကြီးမြို့ပေါ် ထွက်ပြေးတိမ်းရှောင်ကြတာဖြစ်ပြီး တချို့လည်း ဆီဆိုင်မြို့နယ်ထဲက တိုက်ပွဲ မဖြစ်တဲ့ ကျေးရွာပိုင်းမှာ ထွက်ပြေးတိမ်းရှောင်ကြတယ်လို့ ဆိုပါတယ်။
ပြီးခဲ့တဲ့ ၂၀၂၄ ခုနှစ် ဩဂုတ် ၃ ရက်ကလည်း ဆီဆိုင်မြို့နယ်အခြေစိုက် ခြေမြန်တပ်ရင်း (ခမရ ၄၂၃)ကနေ ပအိုဝ်း တပ်မတော်- PNLA ဌာနချုပ် တည်ရှိရာ မောက်မယ်မြို့နယ် ဗန်းမက်ရွာကို လက်နက်ကြီး ပစ်ခတ်တာကြောင့် ဒေသခံတွေ ထွက်ပြေးတိမ်းရှောင်ခဲ့ရတဲ့ ဖြစ်စဉ်လည်း ရှိခဲ့ပါတယ်။
