မိုင်းရူပ၊ ဖေဖော်ဝါရီ ၂၁ ရက်၊ သီပေါ
တအာင်းတပ်မတော်- PSLF/TNLA ထိန်းချုပ်ထားတဲ့ သီပေါမြို့အနီးရှိ ကုံးစုံရွာမှာ နေအိမ်အတွင်း ပေါက်ကွဲမှု ဖြစ်ပွားခဲ့ပြီး ဒေသခံ ၂ ဦး သေဆုံးပြီးတော့ ၁ ဦး ဒဏ်ရာရခဲ့တယ်လို့ စုံစမ်းသိရှိရပါတယ်။
ဒီနေ့ ဖေဖော်ဝါရီ ၂၁ ရက် မနက် ၈ နာရီဝန်းကျင်မှာ ကုံးစုံရွာမှ နေအိမ်အတွင်း ပေါက်ကွဲမှု ဖြစ်ပွားခဲ့ကာ မိဘဖြစ်သူ ပွဲချင်းပြီး သေဆုံးခဲ့ပြီးတော့ သားဖြစ်သူက ထိခိုက်ဒဏ်ရာ ရခဲ့ပါတယ်။
“နေအိမ်ထဲ ပေါက်ကွဲတာ။ လက်နက်ကြီးလား၊ ဗုံးလားတော့ မသိရသေးဘူး။ ဒဏ်ရာရတဲ့ ကလေးတွေကို မေးကြည့်နေဆဲပါ။ မိသားစုလိုက်ကို ထိတာ” လို့ သီပေါဒေသခံတစ်ဦးက ရွှေဖီမြေကို ပြောပါတယ်။
ကုံစုံရွာဟာ အရင်က စစ်ကောင်စီရဲ့ ခြေလျင်တပ်ရင်း ၂၃ တပ်အနီးမှာ တည်ရှိပြီး မြေမြှုပ်မိုင်းနဲ့ စစ်လက်နက် အကြွင်းအကျန်ကြောင့် ဒေသခံတွေ မကြာခဏ ထိခိုက်သေဆုံးနေပါတယ်။
ပြီးခဲ့တဲ့ ဖေဖော်ဝါရီ ၁၁ ရက်မှာလည်း သီပေါမြို့နယ် တုံစင့်ရွာမှာ ကေလးငယ်တစ်ဦး မိုင်းနင်းမိပြီး ခြေတစ်ဖက် ဖြတ်လိုက်ရပါတယ်။
ဖေဖော်ဝါရီ ၁၉ ရက်ကလည်း ကွတ်ခိုင်မြို့နယ် မုံးစီးမှာ စစ်လက်နက် အကြွင်းအကျန် ယူဆော့မိရာကနေ ကလေးငယ်တစ်ဦး သေဆုံးပြီး ၁ ဦး ထိခိုက်ဒဏ်ရာရခဲ့ပါတယ်။
ဇန်နဝါရီလအတွင်း ရွှေဖီမြေက ရရှိထားတဲ့ စာရင်းအရ မြေမြှုပ်မိုင်းနဲ့ စစ်လက်နက်အကြွင်းအကျန်တွေကြောင့် ထိခိုက်သေဆုံးသူ ၅ ဦး ရှိခဲ့ပါတယ်။
၂၀၂၃ ခုနှစ်အတွင်း မြန်မာနိုင်ငံမှာ စစ်လက်နက်ပစ္စည်းတွေကြောင့် သေဆုံးသူ ၁၈၈ ဦးနဲ့ ဒဏ်ရာရသူ ၈၆၄ ဦး ရှိခဲ့တယ်လို့ ကုလသမဂ္ဂ ကလေးများရန်ပုံငွေအဖွဲ့- UNICEF က ထုတ်ပြန်ထားပါတယ်။
