ရွှေဖီမြေ၊ ဇန်နဝါရီ ၁၉ ရက်၊ ရေး
မွန်ပြည်နယ် ရေးမြို့နယ်ထဲ စစ်ကောင်စီတပ်နဲ့ မွန်ပြည် လွတ်မြောက်ရေးတပ်တော်- MLA ပူးပေါင်းတပ်တို့အကြား တိုက်ပွဲ ဖြစ်ပွားခဲ့ရာ စစ်တပ်ဘက်က ၇ဝ ဦးခန့် သေဆုံးခဲ့ကြောင်း MLA က ဒီနေ့ ဇန်နဝါရီ ၁၉ ရက်မှာ ထုတ်ပြန်လာပါတယ်။
ရေးမြို့နယ် ကျုံးလောင်းရွာအနီး စစ်ကောင်စီ စကခ ၁၉ လက်အောက်ခံ ခလရ ၃၁၊ ၆၁၊ ၁၀၆၊ ခမရ ၂၉၉၊ ၃၄၃၊ ၅၈၆၊ ၅၈၇၊ ၅၈၃၊ ၅၉၁ နဲ့ အမတ ၃၁၆ က အင်အား အလုံးအရင်းနဲ့ စစ်ကြောင်း ထိုးလာရာ ဇန်နဝါရီ ၉ ရက်အပြင် ၁၁ ရက်နဲ့ ဒီနေ့အထိ တိုက်ပွဲ ပြင်းထန်နေတယ်လို့ ဆိုပါတယ်။
စစ်တပ်ဘက်က လက်နက်ကြီး ရမ်းသမ်းပစ်ခတ်ပြီး ဇန်နဝါရီ ၁၁ ရက်က လေကြောင်း တိုက်ခိုက်မှု ၂ ကြိမ် ပြုလုပ်ခဲ့ကြောင်းနဲ့ စစ်ကောင်စီတပ်ဘက်မှ သေဆုံးသူအပြင် ၃၀ ထက်မနည်း ဒဏ်ရာ ရရှိခဲ့ကြောင်း ဖော်ပြထားပါတယ်။
MLA နဲ့ ပူးပေါင်းတပ်ဖွဲ့ဘက်က ၃ ဦးဟာ မစိုးရိမ်ရတဲ့ ထိခိုက်ဒဏ်ရာ ရရှိခဲ့ကြောင်း ဆက်လက် ဖော်ပြထားပါတယ်။
