မိုင်းရူပ၊ ဇန်နဝါရီ ၁၉ ရက်၊ မိုးကုတ်
တအာင်းတပ်မတော်- PSLF/TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့မှာ သေနတ်နဲ့ ခြိမ်းခြောက်ပြီး ဓားပြတိုက်မှုထပ်မံ ဖြစ်ပွားခဲ့ပြီးတော့ ငွေသားနဲ့ လက်ဝတ်ရတနာတချို့ ပါသွားပါတယ်။
ဇန်နဝါရီ ၁၇ ရက် နေ့လယ် ၁ နာရီခွဲမှာ မိုးကုတ်မြို့အနောက်ပိုင်း ကမ္ဘာအေးရပ်ကွက်ရှိ နေအိမ်တစ်ခုကို လက်နက်ကိုင်ထားတဲ့ လူတစ်စုက ဓားပြတိုက်ခဲ့ရာ ငွေသား ၅၈ သိန်း၊ ရွှေ ၁ ကျပ်သား၊ ဖုန်းတစ်လုံးနဲ့ ကျောက် ၃ ပွင့် ပါသွားခဲ့ပါတယ်။
“သေနတ်နဲ့ ခြိမ်းခြောက်ပြီး ဓားပြ တိုက်သွားတာ။ ဓားပြ လာတိုက်တဲ့လူ အရေအတွက်တော့ မသိရသေးဘူး။ အဓိကတော့ မူးယစ်ဆေးဝါးကြောင့်လို့ထင်တယ်။ ဖမ်းတော့ လိုက်ဖမ်းနေတယ်။ ဆက်ရှိနေတုန်းပဲ” လို့ ဖြစ်စဥ်ကိုသိရှိတဲ့ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
လက်ရှိအချိန်ထိ ဓားပြတိုက်သူကို PSLF/TNLA ဘက်က ဖမ်းဆီးရမိတာ မရှိသေးဘဲ ဓားပြတိုက်တဲ့အဖွဲ့တွေကို TNLA က လိုက်လံ ရှာဖွေနေပြီး မြို့လုံခြုံရေး တင်းကြပ်ထားတယ်လို့ နောက်ထပ် သတင်းအရင်းအမြစ်တစ်ဦးက ပြောပါတယ်။
“ဖမ်းမိတာတော့ မရှိသေးဘူး။ လုံခြုံရေးတွေ တင်းကြပ်တာတော့ ရှိတယ်။ ကာကွယ်ရေး၊ ရဲအင်အား၊ အုပ်ချုပ်ရေးအင်အားတွေ ထပ်ဖြည့်ထားတယ်”
ပြီးခဲ့တဲ့ ဒီဇင်ဘာ ၁၉ ရက်ကစပြီး ဇန်နဝါရီ ၁၇ ရက်အထိ ၁ လနီးပါးအတွင်း မိုးကုတ်မှာ ဓားပြတိုက်မှု ၄ ကြိမ်အထိ ဖြစ်ပွားခဲ့ပြီ ဖြစ်ပါတယ်။
ဇန်နဝါရီ ၁၄ ရက်မှာ မိုးကုတ်မြို့ အနောက်ပိုင်း ညောင်ပင်ကြီးရပ်ကွက်ရှိ နေအိမ်တစ်ခုမှာ ပစ္စတိုသေနတ် ကိုင်ထားတဲ့ အသက် ၃၀ ဝန်းကျင် အမျိုးသားတစ်ဦးက ဓားပြ ဝင်တိုက်ရာ ငွေ ၇၄၈ သိန်းနဲ့ နားကပ်တစ်ရံ တန်ဖိုး သိန်း ၅၀ ခန့် စုစုပေါင်း တန်ဖိုး သိန်း ၈၀၀ နီးပါး ပါသွားခဲ့ပါတယ်။
ဒီဇင်ဘာ ၁၉ ရက်မှာလည်း TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့နယ် ၇ မိုင်ကျေးရွာက နေအိမ်တစ်ခုမှာ ဓားပြတိုက်မှု ဖြစ်ပွားခဲ့ပြီး လက်ဝတ်ရတနာတချို့ ပါသွားခဲ့ပါတယ်။
မိုးကုတ်မှာ ဓားပြတိုက်မှု မကြာခဏဖြစ်ပွားနေတာနဲ့ ပတ်သက်ပြီး အသေးစိတ်သိရဖို့ PSLF/TNLA ရဲ့ ပြောရေးဆိုခွင့်ရှိသူ လွေးယေဦးကို စာပို့ဆက်သွယ်ခဲ့ပေမဲ့ လက်ခံဖြေကြားတာ မရှိသေးပါဘူး။
လက်ရှိ မိုးကုတ်မှာ TNLA တပ်ဖွဲ့အပြင် တခြားတော်လှန်ရေးတပ်ဖွဲ့ ၄ ဖွဲ့ထက်မနည်းလည်း သွားလာနေကြောင်း ရွှေဖီမြေက စုံစမ်းသိရှိရပါတယ်။
