မိုင်းရူပ၊ ဇန်နဝါရီ ၁၃ ရက်၊ မိုးကုတ်
တအာင်းတပ်မတော်- PSLF/TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့ထဲက နေအိမ်တစ်ခုမှာ ဓားပြတိုက်မှု ထပ်မံ ဖြစ်ပွားခဲ့ရာ အမျိုးသားတစ်ဦး ပစ်ခတ်ခံရပြီး သေဆုံးသွားတယ်လို့ ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ဇန်နဝါရီ ၁၀ ရက်မှာ မိုးကုတ်မြို့ အနောက်ပိုင်းရှိ ရေဦးကြီးရပ်ကွက်မှာ လက်နက်ကိုင်ထားတဲ့ လူတစ်စုက နေအိမ်တစ်ခုမှာ ဓားပြတိုက်ခဲ့ရာ အိမ်ရှင်ဖြစ်သူကို ကြိုးတုတ်ထားစဉ် နေအိမ်ထဲ ဝင်လာတဲ့ အမျိုးသားတစ်ဦးကို ဓားပြတိုက်တဲ့သူက ပစ်ခတ်တာကြောင့် သေဆုံးသွားတာပဲ ဖြစ်ပါတယ်။
“သေသွားတဲ့ အမျိုးသားက ဧည့်သည်ပဲ။ တရုတ်လူမျိုးလို့ သိရတယ်။ ဓားပြတွေက အိမ်ရှင်ကို ကြိုးနဲ့ တုတ်ထားတဲ့အချိန်မှာ သူက အိမ်ထဲ ဝင်လာတာ။ ပစ်လိုက်တော့ ဆုံးသွားတာ” လို့ ဖြစ်စဉ်ကိုသိရှိတဲ့ သတင်းအရင်းအမြစ်တစ်ဦးက ရွှေဖီမြေကို ပြောပါတယ်။
ဓားပြတိုက်မှုကြောင့် ပါသွားတဲ့ပစ္စည်းနဲ့ အရေအတွက်ကို မသိရသေးဘဲ ဓားပြတိုက်သူတွေကို ဖမ်းဆီးရမိခြင်း မရှိသေးဘဲ TNLA က လိုက်လံ ရှာဖွေနေဆဲဖြစ်တယ်လို့ သူက ဆက်ပြောပါတယ်။
လက်ရှိ မိုးကုတ်မှာ TNLA အပြင် တခြားတော်လှန်ရေးတပ်ဖွဲ့ ၄ ဖွဲ့ထက်မနည်းလည်း သွားလာနေကြကြောင်း ရွှေဖီမြေက စုံစမ်းသိရှိရပါတယ်။
ပြီးခဲ့တဲ့ ဒီဇင်ဘာ ၁၉ ရက်မှာလည်း TNLA ထိန်းချုပ်ထားတဲ့ မန္တလေးတိုင်း မိုးကုတ်မြို့နယ် ၇ မိုင်ရွာက နေအိမ်တစ်ခုမှာ ဓားပြတိုက်မှု ဖြစ်ပွားခဲ့ပြီး လက်ဝတ်ရတနာတချို့ ပါသွားခဲ့ပါတယ်။
အလားတူ ဒီဇင်ဘာ ၂၇ ရက်က TNLA ထိန်းချုပ်ထားတဲ့ ကျောက်မဲနဲ့ သီပေါမြို့နယ်ကြားရှိ ကျင်တီရွာအနီးမှာ ဓားပြတိုက်မှု ဖြစ်ပွားခဲ့ပါတယ်။
