မိုင်းရူပ၊ ဇန်နဝါရီ ၂၉ ရက်၊ ဖရူဆို
ကရင်နီပြည် ဖရူဆိုနဲ့ ဒီးမော့ဆိုမြို့နယ်ရှိ စစ်ရှောင်စခန်းတွေမှာ ရေရှားပါးမှုပြဿနာ ကြုံတွေ့နေရတယ်လို့ စစ်ရှောင်နဲ့ အကူအညီ ပေးနေသူတွေက ရွှေဖီမြေကို ပြောပါတယ်။
ဖရူဆိုမြို့နယ် အနောက်ခြမ်း အရှေ့ခြမ်းနဲ့ ဒီးမော့ဆိုအနောက်ခြမ်းမှာ ရှိကြတဲ့ စစ်ဘေးရှောင်စခန်းမှာ ချောင်းရေ ခန်းခြောက်လာပြီး တချို့စစ်ရှောင်စခန်းမှာ ရေကို အကန့်အသတ်နဲ့ သုံးနေရတယ်လို့ စစ်ရှောင်တွေကို အကူအညီ ပေးနေသူတစ်ဦးက ရွှေဖီမြေကို ပြောပါတယ်။
“တချို့က ရေ ရနိုင်တဲ့ နေရာတွေကို ရေပုံးဝါတွေ စုတင်ပြီး တချို့က စက်ပေါ် ကားပေါ်မှာ မိုးကာခံပြီး သွားသယ်ရတယ်။ အလှူရှင်တွေ မရောက်နိုင်တဲ့ စစ်ရှောင်စခန်းမှာဆိုရင် စစ်ဘေးရှောင်တွေ ဒီဇယ်ဖိုးစုပြီး ခပ်ရတာတွေ ရှိတယ်။ ရေ ရလာတဲ့အခါလည်း တစ်နေ့ ၂ ပုံးနှုန်းနဲ့ သုံးစွဲရတယ်။ သုံးစွဲဖို့က ထမင်းဟင်း ချက်ပြုတ်ဖို့အတွက်ပဲ။ ရေချိုးဖို့ တစ်ကိုယ်ရေ သန့်ရှင်းရေးလုပ်ဖို့ မပါဘူး”
ကရင်နီပြည်ရှိ စစ်ရှောင်စခန်းမှာ နွေရာသီရောက်တိုင်း နှစ်စဥ်လိုလို ရေရှားပါးမှု ကြုံနေရပြီး အကူအညီ လိုအပ်နေတယ်လို့ ဒီးမော့ဆိုအနောက်ခြမ်းရှိ စစ်ဘေးရှောင်အမျိုးသမီးတစ်ဦးက ရွှေဖီမြေကို ပြောပါတယ်။
“တချို့ကြတော့ တောင်ကျရေကိုပဲ သောက်နေရတယ်ဆိုတော့ အခုက နွေရာသီရောက်တော့မယ်ဆိုတော့ ချောင်းရေတွေလည်း ခန်းခြောက်လာတယ်။ လာမယ့် လတွေမှာ ရေရှားမှုပြဿနာက ပိုကြုံရနိုင်တယ်”
စစ်တပ် အာဏာသိမ်းပြီးနောက်ပိုင်း ကရင်နီပြည်မှာ စစ်တပ်နဲ့ ကရင်နီတော်လှန်ရေးအင်အားစုတို့ တိုက်ပွဲကြောင့် နေရပ်စွန့်ခွာထွက်ပြေးနေရသူ ၂ သိန်း ရှိတယ်လို့ သိရပါတယ်။
