မြတ်နိုး၊ ဖေဖော်ဝါရီ ၂၂ ရက်၊ မံစီ
ကချင်ပြည်နယ် ဗန်းမော်ခရိုင် မံစီမြို့နယ် မံသာ(မံစီ)ကျေးရွာအုပ်စု မံသာ (မံစီ)ရွာမှာ တိုက်ပွဲ ဖြစ်ပွားခြင်းမရှိဘဲ ဖေဖော်ဝါရီ ၂၁ ရက် ညနေပိုင်းက လေကြောင်းနဲ့ ဗုံးကြဲတိုက်ခိုက်လို့ လသားအရွယ် ကလေးငယ်အပါအဝင် အရပ်သား ထိခိုက်မှု၊ သေဆုံးမှုရှိကြောင်း ဒေသခံတွဆီက သိရပါတယ်။
“ဖေဖော်ဝါရီလ ၂၁ ရက်နေ့က မံသာ(မံစီ)ရွာမှာ စစ်ကောင်စီက Y-12 တိုက်လေယာဉ်နဲ့ ဗုံး လာကြဲသွားတာပါ” လို့ ဒေသခံ အမျိုးသားတစ်ဦးက ပြောပါတယ်။
ညနေ ၄ နာရီကနေ ၄ နာရီခွဲအထိ ဗုံး ၄ လုံး လာကြဲသွားပြီး ပေါက်ကွဲသံ ၁၂ ခါ ကြားခဲ့ရတယ်လို့ ဆိုပါတယ်။
“နေအိမ် ၃ အိမ် ထိခိုက်ပျက်စီးသွားတယ်။ အသက် ၈ နှစ်အရွယ် မောင်ငွါးဆာလနဲ့ အသက် ၂၀ အရွယ် မယာမဆီး သေဆုံးသွားတယ်” လို့ နောက်ထပ် ဒေသခံတစ်ဦးက ပြောပါတယ်။
ထိခိုက်ဒဏ်ရာရသူ ၃ ဦးရှိပြီး အသက် ၈ လအရွယ် ငွါးယေမီးက ဘယ်ဘက်ပါးနဲ့ ဘယ်ဘက်လက် ထိခိုက်ဒဏ်ရာရပြီး အသက် ၁၀ နှစ်အရွယ် မောင်လုကာက ညာဘက်ပါင်မှာ ထိခိုက်ဒဏ်ရာရကာ ၂၇ နှစ်အရွယ် ဒေါ်ထွန်းစန္ဒာက ဘယ်ဘက်လက်မှာ ထိခိုက်ဒဏ်ရာ ရရှိသွားတယ်လို့ သူက ဆက်ပြောပါတယ်။
ဒါ့အပြင် ဖေဖော်ဝါရီ ၂၁ ရက် နေ့လယ် ၁၂ နာရီခွဲခန့်က ဗန်းမော်မြို့ရဲ့ တစ်ဖက်ကမ်းက စစ်ရှောင်တွေရှိတဲ့ ရေလဲရွာဘက် တိုက်ပွဲ ဖြစ်ပွားတာမရှိဘဲ လေကြောင်းနဲ့ ဗုံးကြဲတိုက်ခိုက်လို့ ဒေသခံ အမျိုးသမီး ၂ ဦးနဲ့ အမျိုးသား ၁ ဦး ထိခိုက်ဒဏ်ရာ ရခဲ့ကြောင်း ဒေသခံတွေဆီက သိရပါတယ်။
ပြီးခဲ့တဲ့ ဖေဖော်ဝါရီ ၁၉ ရက် မနက် ၂ နာရီခန့်ကလည်း မိုးမောက်မြို့နယ် ဝက်ငင်းနဲ့ နှင်းအီရွာကို စစ်တပ်က လေကြောင်းကနေ ဗုံးကြဲတိုက်ခိုက်ခဲ့လို့ ၁၀ နှစ်အောက် ကလေးငယ် ၃ ဦးအပါအဝင် မိသားစု ၇ ဦးသေဆုံးခဲ့ပြီး ၅ ဦး ဒဏ်ရာ ရရှိခဲ့ပါတယ်။
