မိုင်းပန်ပျော်၊ ဇန်နဝါရီ ၂၀ ရက်၊ နမ့်ခမ်း
တအာင်းတပ်- TNLA ထိန်းချုပ်ထားတဲ့ ရှမ်းမြောက် နမ့်ခမ်းမြို့နယ် ပန်လော်ကျေးရွာမှာ ကျောင်းသူ ကျောင်းသား ၉၀ ဝန်းကျင်ရှိပြီး စာသင်ကြားဖို့အတွက် ကျောင်းဆောင် မလုံလောက်တာကြောင့် အခက်တွေ့နေကြပါတယ်။
ကလေးတွေ စာသင်ဖို့ ကျောင်းဆောင် မလုံလောက်တာအပြင် ဆရာဆရာမတွေအတွက် ရုံးခန်းလည်း မရှိသေးတာကြောင့် အခက်အခဲ ကြုံနေရတယ်လို့ ပန်လော်ရွာမှ ကျောင်းကော်မတီဝင် မိုင်းညီလောတ်က ရွှေဖီမြေကို ပြောပါတယ်။
“ကျောင်းမှာတော့ ၉ တန်းအထိ ရှိတယ်။ ဆရာမတွေရဲ့ နားဆောင်ထဲ စာသင်ပေးနေရတာ။ ကလေးတွေကို စာသင်ပေးတဲ့အချိန်ဆိုရင်လည်း အခန်းတွေ တအားကပ်တော့ စာသင်ပေးရတာ မပြေလည်ဘူး။ ဝါးထရံနဲ့ပဲ ခြားတယ်ဆိုတော့ ကလေးတွေက ဆူညံနေတာ။ စာသင်ပေးတဲ့အချိန်လည်း အာရုံမစိုက်နိုင်ဘူး”
ကျောင်းဆောင်နဲ့ ရုံးခန်း ပြန်ဆောက်ဖို့အတွက် ကျေးရွာခံတွေက တတ်နိုင်တဲ့ ငွေအားနဲ့ ဝိုင်းဝန်းကူညီကြပေမဲ့ မလုံလောက်တာကြောင့် ကျောင်းဆောင်အသစ် ပြန်ဆောက်နိုင်ဖို့အတွက် အကူအညီ လိုအပ်နေတယ်လို့ မိုင်းညီလောတ်က ဆက်ပြောပါတယ်။
ပန်လော်ရွာက စာသင်ကျောင်းဟာ စစ်တပ်အာဏာသိမ်းပြီးကတည်းက ကျောင်းပိတ်ထားခဲ့ရာကနေ ပြီးခဲ့တဲ့ ၂၀၂၂ ခုနှစ်မှာတော့ တအာင်းပြည် ပညာရေးကောင်စီ- TLEC က စာသင်ကျောင်း ပြန်လည် ဖွင့်လှစ် ပေးခဲ့တာပဲ ဖြစ်ပါတယ်။
