အင်းငယ်၊ ဇန်နဝါရီ ၂၉ ရက်၊ ဒီးမော့ဆို
ကရင်နီပြည် ဒီးမော့ဆိုမြို့နယ်မှာ မနေ့ ဇန်နဝါရီ ၂၈ ရက်ကစပြီး ညမထွက်ရအမိန့်ထုတ်ပြန်ထားတယ်လို့ မြို့နယ်အုပ်ချုပ်ရေးကောင်စီရဲ့ တာဝန်ရှိသူတွေက ပြောပါတယ်။
၂၀၂၅ ခုနှစ် အစောပိုင်းအတွင်း စစ်တပ်က စစ်ကြောင်း ထိုးလာပြီးနောက် လက်နက်ကြီးနဲ့ လေကြောင်း ပစ်ခတ်မှုကြောင့် ညဘက် သွားလာခွင့် ကန့်သတ်လိုက်တာလို့ ဆိုပါတယ်။
မြေပြင်အရင်းအမြစ်တစ်ဦးက “စကစဖက်က လက်နက်ကြီး ညတိုင်း ထုနေလို့ ပိတ်ထားတာပါ။ အကြာကြီး ပိတ်ထားလို့ မရတာ အကုန်လုံး သိပါတယ်။ ဒေသခံတွေရော၊ စစ်ဘေးရှောင်တွေရော လုံခြုံရေးသတိ ရှိစေချင်ပါတယ်။ ဗုံးခိုကျင်းတွေ တူးထားဖို့ လိုအပ်ပါတယ်” လို့ ပြောပါတယ်။
ညဘက် ၇ နာရီမှ မနက် ၅ နာရီအတွင်း ဖြတ်သန်းခွင့်မရှိဆိုတဲ့ ထုတ်ပြန်ချက်ဟာ ဒီးမော့ဆိုမြို့နယ်အတွင်းက စစ်ဘေးရှောင်၊ ဒေသခံနဲ့ တပ်ရင်းတပ်ဖွဲ့ဝင်အားလုံး ပါဝင်ပြီး ကျူးလွန်ဖောက်ဖျက်သူကို ကြီးလေးတဲ့ပြစ်ဒဏ် ချမှတ်သွားမယ်လို့ ဆိုပါတယ်။
ဒါ့အပြင် ကန့်သတ်ချိန်အတွင်း သွားလာသူကို တင်းတင်းကြပ်ကြပ် စစ်ဆေးသွားမှာဖြစ်ပြီး ဒဏ်ငွေအနေနဲ့လည်း ဆိုင်ကယ် ၅ သောင်း၊ ကား ၁ သိန်းကျပ်အထိ ပေးဆောင်ရမယ်လို့ သတ်မှတ်ထားပါတယ်။
ဒီးမော့ဆိုမြို့နယ်အတွင်း နေထိုင်တဲ့ စစ်ဘေးရှောင် အမျိုးသမီးတစ်ဦးက “နယ်မြေအခြေအနေကတော့ ညတိုင်း ပစ်နေတာပဲ။ မထွက်ရင်တော့ အကောင်းဆုံးပေါ့။ ဒီအချိန် ဘာအမိန့်မှ မထုတ်လည်း ထွက်တဲ့လူ မရှိလောက်ပါဘူး။ လက်နက်ကြီးကတော့ လေကြောင်းနဲ့စာရင် တော်သေးတယ် ပြောရမှာပေါ့နော်” လို့ ပြောပါတယ်။
ဒီးမော့ဆိုမြို့နယ်ကို စစ်ကောင်စီ စစ်ကြောင်း ထိုးလာပြီးနောက်ပိုင်း မနေ့ ဇန်နဝါရီ ၂၈ ရက်မှာ လက်နက်ကြီး ၃ ကြိမ် ပစ်ခတ်ခဲ့ရာ စစ်ဘေးရှောင်စခန်းအနီးတစ်ဝိုက်၊ လယ်ကွင်းနဲ့ တောင်ပေါ်မှာ ကျရောက်ပေါက်ကွဲခဲ့တယ်လို့ သိရပါတယ်။
ဒါ့အပြင် ဇန်နဝါရီလ ၂၅ ရက်ကလည်း ဒီးမော့ဆိုမြို့နယ် အနောက်ဘက်ခြမ်းကို စစ်တပ်က လက်နက်ကြီး ၁၀ ကြိမ်ထက်မနည်း ပစ်ခတ်ခဲ့ပါသေးတယ်။
အဆိုပါ ပစ်ခတ်မှုအတွင်း လူထိခိုက်မှု မရှိခဲ့ပေမဲ့ နယ်မြေလုံခြုံရေးအရ မြို့နယ်အုပ်ချုပ်ရေးကောင်စီက ညဘက် သွားလာခွင့် ကန့်သတ်လိုက်တာဖြစ်ပြီး ဒီးမော့ဆိုမြို့နယ်အတွင်း သက်ဆိုင်ရာ တပ်ရင်းတပ်ဖွဲ့ဝင်က လက်ရှိမှာ လုံခြုံရေးဆိုင်ရာ ကိစ္စရပ်ကို လှည့်လည်ဆောင်ရွက်နေကြတယ်လို့ သိရပါတယ်။
