ရွှေဖီမြေ၊ ဖေဖော်ဝါရီ ၁ ရက်
စစ်တပ်က အာဏာသိမ်းထားတဲ့ ၄ နှစ်အတွင်း ကျူးလွန်ခဲ့တဲ့ အပြစ်တွေကို နိုင်ငံတကာ အသိုင်းအဝိုင်းအနေနဲ့ လျစ်လျူမရှုဘဲ ဝိုင်းဝန်းဆောင်ရွက်ပေးဖို့ မွန်ခမာမျိုးနွယ်စုဖြစ်တဲ့ တအာင်း၊ ဝ၊ မွန် လူငယ်တွေက ဒီနေ့ ဖေဖော်ဝါရီ ၁ ရက်မှာ ပူးပေါင်းပြီး ထုတ်ပြန်တောင်းဆိုလာပါတယ်။
စစ်တပ်က လူထုတွေကို အဓိက ပစ်မှတ်ထားပြီး ဥပဒေမဲ့ ဖမ်းဆီးသတ်ဖြတ်တာ၊ မတရားစွဲဆိုချက်နဲ့ ထောင်ချတာ၊ ပြည်သူပိုင်အိုးအိမ်စည်းစိမ်ကို ရည်ရွယ်ချက်ရှိရှိ မီးရှို့ ဖျက်ဆီးတာ၊ အများပိုင် ဆေးရုံ၊စာသင်ကျောင်း၊ ဈေးနဲ့ သာသနာ့ အဆောက်အအုံတွေကို လေကြောင်းနဲ့ တိုက်ခိုက်တာတွေကို နေ့တိုင်းလိုလို ကျူးလွန်နေတာတွေ ရှိတယ်လို့ ဆိုပါတယ်။
လူအင်အား ချို့တဲ့လာတဲ့ စစ်တပ်က လူငယ်တွေကို အဓိက ပစ်မှတ်ထားပြီးအတင်းအကြပ် စစ်မှုထမ်းစေတာတွေ ဆက်တိုက် လုပ်ဆောင်နေတာ ရှိတယ်လို့ ပြောဆိုထားပါတယ်။
အာဏာသိမ်းကာလအတွင်း အခက်အခဲ၊ ဒုက္ခမျိုးစုံ ဆင်းရဲပင်ပန်းမှု၊ တိုင်းပြည်နဲ့ လူထုတွေရဲ့ အနာဂတ် ဖက်ဒရယ် ဒီမိုကရေစီ ရရှိရေးနဲ့ စစ်အာဏာရှင် အမြစ်ဖြတ်ချေမှုန်းရေး စတဲ့ရည်ရွယ်ချက်နဲ့အတူ ဒီနေ့အထိ တော်လှန်ရေးခရီးကို မဆုတ်မနစ်ဘဲ လျှောက်လှမ်းနေပါတယ်လို့ ဆိုပါတယ်။
မျိုးဆက်သစ်လူငယ်၊ အကြမ်းဖက် အာဏာဖီဆန်ရေး အင်အားစု ပါဝင်ခဲ့ကြတဲ့ ပြည်သူ့ဝန်ထမ်း၊ တိုင်းရင်းသားတော်လှန်ရေးတပ်ဖွဲ့၊ တော်လှန်ရေးအင်အားစု၊ အရပ်ဖက်အဖွဲ့အစည်းနဲ့ ပြည်ပရောက် ဒေသခံတွေ အဖက်ဖက်ကနေ ကူညီပေးခဲ့ကြတဲ့အတွက် ကျေးဇူးတင်ရှိကြောင်းလည်း ဖော်ပြထားပါတယ်။
စစ်အာဏာရှင် အမြစ်ပြတ်တဲ့အထိ တအာင်း၊ ဝ၊ မွန် လူငယ်တို့အကြား အချိတ်အဆက်မပြတ် ဆက်လက် တိုက်ပွဲ ဝင်သွားမယ်လို့လည်း ထုတ်ပြန်ချက်မှာ ဆက်လက် ဖော်ပြထားပါတယ်။
