ရွှေဖီမြေ၊ မတ်လ ၁၁ ရက်
ညီနောင်မဟာမိတ် ၃ ဖွဲ့ ရရှိထားတဲ့ အောင်မြင်မှုဟာ တာရှည်ခံဖို့ အစမ်းသပ်ခံကာလဖြစ်ပြီး ၃ ဖွဲ့အကြား စည်းလုံးညီညွတ်မှု လက်ရှိထက်ပိုပြီး လုပ်ဆောင်သွားရမယ်လို့ တအာင်းတပ်မတော်- TNLA နဲ့ အာရက္ခတပ်တော်- AA က ပြောဆိုလာပါတယ်။
ဒီနေ့ မတ်လ ၁၁ ရက်မှာ ကျရောက်တဲ့ ကိုးကန့်တပ်မတော်- MNDAA တည်ထောင်ခြင်း ၃၆ နှစ်ပြည့်မှာ TNLA နဲ့ AA က ပေးပို့တဲ့ သဝဏ်လွှာမှာ အခုလို ဖော်ပြထားတာ ဖြစ်ပါတယ်။
လက်ရှိ MNDAA ရဲ့ ရည်မှန်းချက်မှာ အတိုင်းအတာတစ်ခုအထိ အောင်မြင်ခဲ့ပြီး အောင်မြင်မှုနဲ့အတူ အခက်အခဲအတားအဆီးတွေ သတိပြုရမှာကိုလည်း လက်ရှိအခြေအနေဟာ မီးမှောင်းထိုးပြသနေပြီး ညီနောင်မဟာမိတ် ၃ ဖွဲ့အနေနဲ့ ရှိအတူ မရှိအတူ ညီနောင်အနေနဲ့ ၁၅ နှစ်ကြာ အခက်အခဲတွေကို ရင်ဆိုင်ကျော်ဖြတ်ခဲ့ပြီ ဖြစ်တယ်လို့ ဆိုပါတယ်။
ကိုးကန့်ဒေသ ပြန်လည် တည်ဆောက်ရေးမှာ ရင်ဆိုင်ကြုံတွေ့ရမယ့် အခက်အခဲတွေကို ကျန်ညီနောင် ၂ ဖွဲ့အနေနဲ့ ညီနောင်မဟာမိတ် စိတ်ရင်းနဲ့ ကျော်ဖြတ်သွားဖို့ အသင့်ရှိကြောင်း ဖော်ပြထားပါတယ်။
လွန်ခဲ့တဲ့ ၁၉၈၉ ခုနှစ် မတ်လ ၁၁ ရက်မှာ ကိုးကန့်ခေါင်းဆောင် ဦးဖုန်ကြာရှင် ဦးဆောင်ဖွဲ့စည်းခဲ့တဲ့ မြန်မာအမျိုးသားဒီမိုကရက်တစ် တပ်မတော်ခေါ် ကိုးကန့်တပ်- MNDAA ဟာ ဒီနေ့ မတ်လ ၁၁ ရက်မှာ ၃၆ နှစ် ပြည့်ခဲ့ပြီ ဖြစ်ပါတယ်။
ညီနောင်မဟာမိတ် ၃ ဖွဲ့ဟာ ပြီးခဲ့တဲ့ ၂၀၂၃ ခုနှစ် အောက်တိုဘာ ၂၇ ရက်မှာ ၁၀၂၇ စစ်ဆင်ရေးကို ဖော်ဆောင်ခဲ့ပြီး MNDAA က လောက်ကိုင်၊ ကုန်းကြမ်း၊ ချင်းရွှေဟော်၊ ကွမ်းလုံ၊ သိန္နီ၊ လားရှိုး၊ တာမိုးညဲ၊ မုံးကိုးနဲ့ ပန်ဆိုင်း(ကြူကုတ်)မြို့တွေကို တိုက်ခိုက်သိမ်းပိုက်ထားပါတယ်။
၁၀၂၇ စစ်ဆင်ရေးအတွင်း တိုက်ခိုက်သိမ်းပိုက်ထားတဲ့ မြို့တွေကို MNDAA က အထူးဒေသ ၁ အဖြစ် ကြေညာထားပြီး အုပ်ချုပ်သွားမယ်လို့ ထုတ်ပြန်ပြောဆိုထားပါတယ်။
